Oktyabrın 31-də Bakı Caz Mərkəzində Mədəniyyət və Turizm Nazirliyinin və Azərbaycan Mədəniyyət Fondunun birgə təşkilatçılığı ilə keçirilən “Bakı Caz festivalı - 2013” çərçivəsində növbəti konsert proqramı təqdim olunmuşdur.
AzərTAc xəbər verir ki, konsert proqramında Azərbaycan Televiziyasının estrada-simfonik orkestrinin vibrafon ifaçısı Allahyar Vəzirov səhnəyə çıxmışdır.
Bakı Caz festivalında ilk dəfə iştirak edən Allahyar Vəzirov C.Jobimin “How İnsensative”, Carlos Sontananın “Maria” və “Şokaladın tamı” adlı caz musiqilərini improvizasiyada ifa etmişdir.
Azərbaycanda yeganə vibrafon ifaçısı olan A.Vəzirov əcnəbi caz musiqiləri ilə yanaşı, özünün “Çikaqo” əsərini də cazsevərlərə təqdim etmişdir.
Müxtəlif kompozisiyalar ifa edən Allahyar Vəzirovun çıxışı tamaşaçıların gurultulu alqışları ilə qarşılanmışdır.