Cənubi Afrika Respublikasının dövlət başçısı Jacop Zuma dünən dekabrın 5-də dünyasını dəyişmiş eks-prezident Nelson Mandelanın 15 dekabrda torpağa tapşırılacağını bildirib. Ölkədə bayraqların bu gündən etibarən endirildiyini söyləyən Zuma 10 günlük matəm elan edib.
Dövlət başçısı Jacop Zuma 95 yaşında vəfat etmiş Mandelanın Yohannesburqdakı evini ziyarət edib. 
27 il həbs həyatı yaşamış, dünyanın ən məşhur məhkumu olan Mandela doğum yeri Şərq Cape əyalətindəki Qunu kəndində torpağa veriləcək. Əsgər və polislər Qunuda geniş təhlükəsizlik tədbirləri almış vəziyyətdədirlər. Mandelanın nəşi hal-hazırda paytaxt Pretoriyadakı 1 Military Xəstəxanasındadır. Onun cənazəsinin ziyarətinə xeyli sayda dövlət başçısının gəlməsi gözlənilir.