“Hazırda Krımda vəziyyət olduqca gərgindir və buna görə də beynəlxalq ictimaiyyətin gündəmindədir. Lakin bu o demək deyil ki, digər “dondurulmuş” münaqişələr, o cümlədən Dağlıq Qarabağ münaqişəsi unudulub”.

Dalgatv APA-ya istinadən xəbər verir ki, bunu Rumıniyanın strateji məsələlər üzrə dövlət katibi Boqdan Auresku bəyan edib:“Əksinə, mən düşünürəm ki, Ukraynadakı durum beynəlxalq ictimaiyyətin daha çox diqqətini cəlb edəcək və bu, güman ki, bu münaqişələrin həlli ilə bağlı səyləri daha da stimullaşdıracaq”.

B.Auersku qeyd edib ki, Dağlıq Qarabağ, habelə bölgənin digər münaqişələri yenə də beynəlxalq ictimaiyyətin gündəmindədir: “Hazırda Ukraynadakı durum geniş müzakirə olunur. Biz istəmirik ki, Krımdakı durum Dağlıq Qarabağdan tutmuş Gürcüstandakı separatçı bölgələr, Krım və Dnestryanı daxil olmaqla, dondurulmuş münaqişələrdən ibarət dairənin yaranmasına səbəb olsun".

B.Auresku bu istiqamətdə dialoqun aparılmasının və beynəlxalq ictimaiyyətin diqqətinin bu münaqişələrin həllinə yönəldilməsinin vacibliyini önə çəkib.