Gürcüstan prezidenti Georgi Marqvelaşvili tərəfindən 157 məhbus əfv olunub.

APA-nın Gürcüstan bürosunun məlumatına görə, bu barədə xüsusi brifinq keçirən Gürcüstan prezidenti yanında Əfv Komissiyasının sədri Zviad Koridze açıqlama verib. O bildirib ki, fevralın 16-21-də prezidentə əfv ərizəsi ilə müraciət edən 890 məhbusun işinə baxılıb. Sonda prezident G. Marqvelaşvili 157 məhbusu əfv edib.

Əfv olunanlardan 93-ü azadlığa çıxıb, 64 məhbusun cəza müddəti azaldılıb. Əfv olunanların içində 6 nəfər qadın var. 

Məlumata görə, əfvə düşənlərin içərisində azərbaycanlı məhbuslar da var.

Gürcüstan ərazisində NATO bazasının yaradılması təklif edilib.

APA-nın “apsny.ge” saytına istinadən verdiyi məlumata görə, bunu Gürcüstan Silahlı Qüvvələrinin Baş Qərargah rəisi, briqada generalı Vladimir Çaçibaya deyib.

“NATO-nun Qara dənizdə güclənməsi imkanlarından biri Şimali Atlantika bloku hərbi gəmilərinin dənizə fərdi səfərləridir. Lakin bunun qarşısını Montro Konvensiyası alır. Digər çıxış yolu NATO-nun Gürcüstan və Ukrayna hərbi donanmalarının gücləndirilməsinə yardım etməsidir. Bu isə böyük maliyyə tələb edir. Əvəzində Gürcüstanın sahil zolağında, strateji əhəmiyyət daşıyan Poti limanında sahil mühafizəsi bazası yaratmaq olar“, - deyə V. Çaçibaya söyləyib.

Qeyd edək ki, NATO Qara dənizdə mövqelərini gücləndirməyə qərar verib.