Gürcüstanla Avropa İttifaqı arasında vizasız gediş-gəlişə dair yekun imzalar atılıb.

APA-nın xəbərinə görə, bu barədə “Azadlıq” radiosunun Brüssel müxbiri Rikard Yozvyak öz “Twitter” səhifəsində yazıb. “Viza liberallaşması barədə saziş imzalandı. Gürcüstanı təbrik edirəm”, - deyə o, qeyd edib.  

Saziş martın 8-də və ya 9-da Avropa İttifaqının rəsmi jurnalında dərc olunaraq qüvvəyə minəcək. Bu tarixdən 20 gün sonra vizasız rejim tətbiq olunmağa başlayacaq. Bu isə martın 28-i tarixinə təsadüf edir.

Qeyd edək ki, vizasız rejim Şengen zonasını əhatə edir.

Bu gün əsən güclü külək azərbaycanlıların kompakt yaşadığı Marneulidə fəsadlar törədib.

APA-nın Gürcüstan bürosunun məlumatına görə, şəhərin Mazmişvili  küçəsində yerləşən “ATAHoldinq” İdman Sarayının qarşısındakı parkda bir küknar ağacı küləyin təsiri ilə aşaraq kökündən çıxıb, sarayın hasarını uçurub.

Ağacın budaqları yaxındakı evləri zədələyib, elektrik dirəyini əyərək, xətləri qırıb.  Hazırda həmin küçədə elektrik xətləri bərpa edilir.  

Marneulinin digər kəndlərində də fəsadlar qeydə alınıb. Baydar və Kürdlər kəndlərində əhalinin həyətyanı sahələrdəki istixanalarının örtüklərini külək aparıb. Saqareco rayon mərkəzində isə güclü külək ağacları kökündən aşırıb və nəticədə 10 avtomobil əzilib. Saqareco rayon İcra Hakimiyyətindən bildirilib ki, hazırda avtomobil sahiblərinə dəyən ziyanı hesablamaq üçün komissiya yaradılıb.