"Silahlı Qüvvələrimiz Ermənistan Silahlı Qüvvələrinin istənilən təxribatının qarşısını almağa hazırdır".

Bunu AzNews.az-a Müdafiə Nazirliyinin mətbuat xidmətinin rəhbəri, polkovnik Vaqif Dərgahlı Ermənistan müdafiə naziri Seyran Ohanyan tərəfindən Azərbaycanın ünvanına səslənən hədə xarakterli açıqlamasına cavab olaraq bildirdi.

Qeyd edək ki, Seyran Ohanyan Ermənistan ordusuna məxsus helikopterin vurulmasına görə, Azərbaycana geniş miqyaslı cavab veriləcəyini söyləyib.

Vaqif Dərgahlının sözlərinə görə, Azərbaycan Silahlı Qüvvələri düşmənin istənilən ehtimal oluna biləcək və atacağı hər bir addımının qarşısını qabaqcadan almağa hazırdır: "Azərbaycanın işğal olunmuş ərazilərində hərbi təlim keçən Ermənistan ordusunun 2 helikopterinin movqelərimizə etdiyi hücuma cavab olaraq düşmənin bir helikopterinin vurulması düşmən tərəfini şoka salıb. Hələ də ermənilər bu şokun təsiri altındadırlar. İşğalçı ölkənin rəhbərliyinin belə açıqlamaları ancaq və ancaq Ermənistanın daxili auditoriyasına hesablanıb. Və Azərbaycan tərəfini narahat etmir".

Qeyd edək ki, noyabrın 12-də saat 13:45 radələrində cəbhənin Ağdam rayonunun Kəngərli kəndindən 1700 metr şimal-şərq istiqamətində Ermənistan SQ-yə məxsus Mi-24 tipli helikopter döyüş kursuna enərək mövqelərimizə hücum edib. Qoşunlarımız tərəfindən açılan cavab atəşi nəticəsində düşmən helikopteri məhv edilib.

Rəsmi Vaşinqton Dağlıq Qarabağda vurulan helikopteri ilə bağlı reaksiya bildirib.

ANS PRESS-in ABŞ-ın "Azadlıq" radiostansiyasına istinadən verdiyi məlumata görə, Dövlət Departamentinin mətbuat katibi Cen Psaki bir daha regionda atəşkəsin rejiminə riayət edilməsi və gərginliyin azadılmasının önəmini xatırladıb.

Departament rəsmisi Dağlıq Qarabağ münaqişəsinin nizamlanması istiqamətində səylərin ikiqat artırmağın önəmini qeyd edib. O, deyib ki, münaqişənin hərbi yolla həlli yoxdur.

Xatırladaq ki, Ermənistan Respublikası Silahlı Qüvvələri tərəfindən keçirilən son təlimlər zamanı düşmən hərbi aviasiyası cəbhəyanı zonada 3 gündür ki, provokasiya xarakterli uçuşlar həyata keçirirlər.

Davamlı olaraq mövqelərimiz üzərində döyüş manevrləri yerinə yetirən düşmən hərbi aviasiyası bu gün daha açıq şəkildə döyüş kursuna çıxaraq uçuşlar keçirməklə mövqelərimizə atəş açmağa cəhd edib.

Noyabrın 12-də saat 13:45 radələrində cəbhənin Ağdam rayonunun Kəngərli kəndindən 1700 metr şimal-şərq istiqamətində Ermənistan Respublikası Silahlı Qüvvələrinə məxsus Mi-24 tipli helikopteri döyüş kursuna enərək mövqelərimizə hücuma cəhd edib. Qoşunlarımız tərəfindən açılan atəş nəticəsində düşmən helikopteri məhv edilib.
Hazırda vurulan düşmən helikopterinin qalıqları müdafiənin ön xəttindən 500 metr qarşıdakı əraziyə düşüb.