Türkiyədə küçələrə əllərində soyuq silahlarla çıxan vətəndaşlar hərbi çevrilişə cəhd edən əsgərləri edam etməyə cəhd göstərirlər.

“Dalga TV ” Hurriyet-ə istinadən xəbər verir ki, İstanbulun “Mətbuat Ekspress yolu”nda polis işçiləri gənc əsgərlərin xilas edilməsi üçün mübarizə aparıblar. Polis havaya atəş açaraq emosional davranan vətəndaşları sakitləşdirməyə çalışıb.

Sözügedən küçədə dayanan tanklardan birinin içindən əsgərin göndərdiyi yazılı məktub hamını təsirləndirib. Əsgər tankın ətrafındakılara göndərdiyi qeyddə “Evliyəm, həyat yoldaşım hamilədir”-, deyə yazıb.

Amma həmin əraziyə yığılan əhali tanka tərəf hücum etməyə çalışıb. Polis TOMA-lardan istifadə edib. 3 saat davam edən mübarizədən sonra 2 əsgər sağ şəkildə polis tərəfindən tutulub.

Qeyd edək ki, ötən gecəki toqquşmalarda vətəndaşlar bir neçə hərbçini döyərək boğazını kəsiblər. Sosial şəbəkələrdə yayılan zorakı fotolar istifadəçilər tərəfindən kəskin tənqid olunub.

ABŞ dövlət katibi Con Kerri Türkiyə XİN rəhbəri Mövlud Çavuşoğlu ilə telefon danışığı zamanı ABŞ-ın Türkiyədəki hadisələrlə əlaqəli olmasına dair iddiaların yalan olduğunu qeyd edib.

APA-nın xəbərinə görə, bu barədə  “Reuters” Dövlət Departamentinin nümayəndəsi Con Kirbi bildirib.

“Con Kerri aydın izah edib ki, ABŞ Türkiyə hökumətin araşdırmaların aparılmasına dəstək verməyə hazırdır, lakin ABŞ-ın dövlət çevrilişi cəhdində rolunun olmasına dair iddialar və bəyanatlar tamamilə yalandır və ikitərəfli münasibətlərimizə zərər vurur”, - deyə Kirbi bildirib.     

ABŞ dövlət katibi  Mövlud Çavuşoğlu ilə telefon danışığı zamanı həmçinin qeyd edib ki, Ankara araşdırma zamanı təmkinlik nümayiş etdirməli və qanuna addımlara yol verməməlidir.   

Kerri və Çavuşoğlu danışıqlar zamanı İŞİD-ə qarşı birgə mübarizənin davam etdirilməsinin vacibliyini qeyd ediblər.