Bu gün Gürcüstanda azərbaycanlıların kompakt yaşadığı Qardabani rayonunda etiraz aksiyası keçirilib.

APA-nın Gürcüstan bürosunun məlumatına görə, aksiyada Vaxtanqisi Gürcüstan-Azərbaycan sərhəd nəzarət-keçid məntəqəsinə yaxın kəndlərin (Vaxtanqisi, Nəzərli və Kosalı), eləcə də Ağstafa rayonunun Sadıxlı, Muğanlı kəndlərinin sakinləri iştirak ediblər.

Aksiya iştirakçıları Gürcüstan tərəfinin süni yaratdıqları problemlərin həll edilməsini tələb ediblər. Aksiyada 25 nəfərdən çox Gürcüstan və Azərbaycan vətəndaşları iştirak edib.

Aksiya iştirakçıları son aylarda sürücülərə 1000 lari həcmində cərimə yazılmasından şikayət ediblər. Aksiya iştirakçılarından Azərbaycan vətəndaşları Rafiq Mustafayev, Rövşən Yusubov, Ceyhun Namazov, Gürcüstan vətəndaşlarından isə Kamran Əliyev və digərləri Vaxtanqisi sərhəd nəzarət-keçid məntəqəsinin əməkdaşlarının onları sorğu-suala tutduqlarını, Gürcüstan və Azərbaycana hansı məqsədlə getdiklərini, özləri ilə nə apardıqlarını, habelə nə vaxt qayıdacaqları barədə suallar verdiklərini bildiriblər. Qeyd olunub ki, idarə etdikləri avtomobillərin yanacaq çənində 10 litrdən artıq yanacaq aşkar edildiyi halda 1000 lari cərimə yazılıb, habelə bəzi hallarda gürcü və rus dillərində suallara cavab verməyən kənd sakinlərinə nəzarət-keçid məntəqəsindən keçməyə icazə verilməyib.

Aksiya iştirakçısı olan Sadıxlı kənd sakini Ceyhun Namazov onun avtomobilinin qapılarının içəri üzlüklərinin söküldüyünü və heç nə tapılmadıqda, yenidən geri yığıldıqda, nəqliyyat vasitəsinin yararsız hala düşdüyünü bildirib. Qardabani rayonunun Kosalı kənd sakini Kərəm Əliyev isə sərhədi keçərkən onlara prosedur qaydaları haqqında ətraflı məlumat verilmədiyini deyib.

Aksiya iştirakçıları sərhəddə qarşılaşdıqları problemlər və əngəllər barədə Gürcüstan Maliyyə Nazirliyinin müvafiq departamentinə məlumat veriblər. Nazirlik rəsmisi Xatiya Moistrapişvili bildirib ki, istər Gürcüstan, istərsə də Azərbaycan vətəndaşlarına Vaxtanqisi sərhəd nəzarət-keçid məntəqəsini keçərkən yazılan cərimələr və protokollarla bağlı faktlar təsdiqlənsə, müəyyən ölçü götürüləcək. 

Gürcüstanın Avstriyadakı səfiri Konstantin Zaldastanişvili Avstriya xarici işlər naziri Sebastyan Kurtsun Gürcüstanda qaçqınlar üçün mərkəz yaradılmasını təklifinin əvvəllər müzakirə olunmadığını bildirib.

APA-nın məlumatına görə, K. Zaldastanişvili Gürcüstanın “Birinci Kanal” telekanalına müsahibəsində deyib ki, bu məsələ indiyə qədər heç bir rəsmi görüşdə müzakirəyə çıxarılmayıb.

K. Zaldastanişvili bu məsələnin S. Kurtsun bir ay əvvəl Gürcüstana səfəri zamanı da gündəlikdə olmadığını vurğulayıb: “Sebastyan Kurtsun konkret nəyi nəzərdə tutduğunu söyləmək mənə çətindir. Gələn həftə Avstriya tərəfi ilə məsləhətləşmələr başlayacaq və məsləhətləşmələrin gedişində məsələ aydın olacaq. Biz bu gün Avstriya Nazirlər Kabineti ilə əlaqə saxlamağa çalışdıq. Ancaq bu gün bazar günüdür və əlaqə yaratmaq çətindir. Sabah biz mütləq Avstriya Xarici İşlər Nazirliyi ilə əlaqə yaradacağıq və məsələyə daha çox aydınlıq gətirilməsinə çalışacağıq.

Qeyd edək ki, bu gün Avstriya xarici işlər naziri Sebastyan Kurts “Bild” qəzetinə müsahibəsində Gürcüstanda qaçqınlar üçün mərkəz yaradılmasını təklif edib. S. Kurts deyib ki, Avropa İttifaqı sərhədlərindən kənarda BMT Qaçqınlar üzrə BMT Qaçqınlar üzrə Ali Komissarlığı ilə birgə fəaliyyətin həyata keçiriləcəyi qaçqınlar üçün mərkəz yaradılmalıdır: “Əsas odur ki, Avropaya qeyri-leqal yolla gəlməyə çalışan insanlar həmin mərkəzə göndərilə bilsin. Belə mərkəzlər Gürcüstan, Misir, yaxud Qərbi Balkan ölkələrində yaradıla bilər”.