პრემიერმა ბიძინა ივანიშვილმა, რომელიც საარჩევნო უბანზე ოჯახთან ერთად გამოცხადდა, ხმა გიორგი მარგველაშვილს მისცა.

"რა თქმა უნდა, გიორგი მარგველაშვილის სასარგებლოდ გავაკეთეთ არჩევანი მთელმა ოჯახმა. არ შეიძლება, არ მაქვს დასახელების უფლება? რატომ მეკითხებით მაშინ", - განაცხადა ბიძინა ივანიშვილმა.

ივანიშვილის მიერ საკუთარი გადაწყვეტილების საჯაროდ დაფიქსირება დარღვევად არ ჩათვალა არც ცესკომ და არც არასამთავრობო ორგანიზაციებმა.

ცესკოს სპიკერის ეკა აზარაშვილის განცხადებით, აგიტაცია, არჩევნების დღეს, საარჩევნო უბნის გარეთ არ იკრძალება. "საერთაშორისო გამჭვირვალობა - საქართველოს" აღმასრულებელი დირექტორის ეკა გიგაურის თქმით, აგიტაცია იკრძალება შენობაში, მაგრამ პრემიერის განცხადება აგიტაცია არ ყოფილა.

ჟურნალისტების კითხვაზე, თუ რის სასარგებლოდ მისცა ხმა, პრემიერმა უპასუხა, რომ არჩევანი საქართველოს მომავლის სასარგებლოდ გააკეთა.

"მინდა, საქართველოს მოსახლეობას მივულოცო დღევანდელი დღე. მაქვს ინფორმაცია, რომ საარჩევნო ყუთებთან რიგებია. დარწმუნებული ვიყავი, რომ დაბალანსებულ სიტუაციაში სწორი არჩევანის გაკეთება შეგვიძილია. ვამტკიცებთ, რომ ევროპელები ვართ და განსხვავებულ სიტუაციაშიც მაქსიმალურ პასუხისმგებლობას ვამჟღავნებთ. თუ გრძნობს მოსახლეობა, დღევანდელი დღეა ცვლილება. ამ ორი წლის განმავლობაში, რაც ოპოზიციაში მოვედით, გავაერთიანეთ საქართველო, დღევანდელი დღე აფორმებს ამას, რომ ჩვენ განსხვავებულ სიტუაციაში ვატარებთ არჩევნებს", - განაცხადა ივანიშვილმა.

იგი მიღწევად მიიჩნევს იმას, რომ ამომრჩევლებმა თავისუფლება იგრძნეს და ხმა საკუთარი ნებით, ძალადობის გარეშე მისცეს.

"ყველაზე დიდი მიღწევა ისაა, რომ ადამიანებს არჩევნების უფლება, ხმის მიცემის უფლება დავუბრუნეთ, მათ თავისუფლება იგრძნეს, რომ არავინ არავის არ აიძულებს. უახლეს ისტორიაში პირველად ხდება, რომ ხელისუფლება არ ცდილობს, რომელიმე კანდიდატის სასარგებლოდ გამოიყენოს სახელისუფლებო ძალა. ადამიანები არიან თავისუფლები, არ აქვთ შიშის განცდა, ამას ეკონომიკური მხარდაჭრა სჭირდება. უახლოეს 20 წელიწადში მთავარი გამოწვევა ეკონომიკა იქნება", -  თქვა პრემიერმა.

საქარტველოს პრეზიდენტმა მიხეილ სააკაშვილმა დღეს, 26 ოქტომბერს ეროვნული გმირის წოდება მიანიჭა საქართველოს პირველ პრეზიდენტს, ზვიად გამსახურდიას.

"როცა არავის ახსოვდა დამოუკიდებლობი იდეა, როცა ქართველების უმეტესობა დაავადებული იყო კონფორმიზმით, რომლის დაბრუნებასაც დღეს ცდილობენ, ზვიად გამსახურდია იყო ამ ეროვნული ჩირაღდნის მატარებელი. სამეგრელოს შორეულ სოფელში მომწყვდეული, მიტოვებული თანამებრძოლების მიერ, არაპოპულარული, დევნილი, მოღალატეებით გარემოცული და ალყაშემორტყმული იყო მაშინდელი საქართველოს სიმბოლო".– განაცხადა პრეზიდენტმა

ზვიად გამსახურდიას გარდა, მიხეილ სააკაშვილმა ეროვნული გმირის წოდება მიანიჭა  გენერალ მაზნიაშვილს:

"ყველა ეპოქას ყავდა თავის გმირები. გადავწყვიტე, ეროვნული გმირის წოდება მივანიჭო გენერალ მაზნიაშვილს, მაშინ, როცა საქართველოს მთავრობას აღარ ჰქონდა სურვილი წინააღმდეგობის გაწევის; მაშინ, როცა პოლიტიკოსები გაიქცნენ; მაშინ, როცა ძალიან ბევრი ქართველი მტრის მხარეს იყო, გენერალმა მაზნიაშვილმა შეკრიბა ადამიანები, ვინც მზად იყო ბრძოლისთვის და ბოლო წუთამდე იბრძოლა. რა თქმა უნდა, იმ წუთში გენარეალი მაზნიაშვილი იყო საქართველო". 

პრეზიდენტმა ეროვნული გმირის წოდება ასევე მიანიჭა საქარველოს ყოფილ პატრიარქს, ამბრიოსი ხელაიას. პრეზიდენტის თქმით, ამბროსი ხელაია არასოდეს დაუჩოქებდა რუსებს:

"ამბროსი ხელაიას, რომელიც იყო მეტეხის ციხეში, ემუქრებოდა გარდაუვალი სიკვდილი. თავაზობდნენ, რომ სიცოცხლის გადარჩენისთვის ებრძოლა. მან თავისი საკნიდან მიწერა წერილი გენუის კონფერენციას, სადაც მოითხოვა საქართველოს დამოუკიდებლობა, იმიტომ, რომ იმ წუთში ამბროსი ხელაია არ იყო ცალკე აღებული ქართველი, ცალკე აღებული სასულიერო მოღვაწე ან თუნცდაც პატრიარქი. ამბროსი ხელაია იყო საქართველო, რომელიც არასდროს დაუჩოქებდა რუსებს. არასდროს არ აულოკავდა მათ ხელებს, არასდროს არ თხოვდა მოწყალებას და მთელ მსოფლიოს ეტყოდა, დიახ, ჩვენ საქართველო ვართ და ჩვენ არ ვიხევთ უკან". 

პრეზიდენტკმა  ეროვნული გმირის წოდება სიკვდილის შემდეგ ასევე მიანიჭა გრიგოლ ფერაძეს, მიხაკო წერეთელს, ექვთიმე თაყაიშვილს და  მერაბ კოსტავას.