დღეს შინაგან საქმეთა სამინისტროში ფარული ჩანაწერების განადგურებასთან დაკავშირებით შეხვედრა გაიმართა. შეხვედრაზე დასახელდა სპეციალური კომისიის შემადგენლობა. სამუშაო ჯგუფის შემადგენლობაში არიან: გენერალური პროკურორი არჩილ კბილაშვილი, სახალხო დამცველი უჩა ნანუაშვილი, არასამთავრობო ორგანიზაცია „საერთაშორისო გამჭვირვალობის“ აღმასრულებელი დირექტორი ეკა გიგაური, საარჩევნო და პოლიტიკური ტექნოლოგიების კვლევითი ცენტრის დირექტორი კახი კახიშვილი, გაზეთ „რეზონანსის“ მთავარი რედაქტორი ლაშა ტუღუში. კომისიას უხელმძღვანელებს შინაგან საქმეთა მინისტრი ირაკლი ღარიბაშვილი.

საბრძოლო მოქმედებების დროს გარდაცვლილი სამხედრო მოსამსახურის ოჯახი ერთჯერადი დახმარების სახით ნაცვლად 15 ათასისა, 100 ათას ლარს მიიღებს. ამის შესახებ თავდაცვის მინისტრის, ირაკლი ალასანიას "ფეისბუქის" ოფიციალურ გვერდზე მიმართვა გავრცელდა.

"ჯარისკაცი თავისი სიცოცხლის ფასად იცავს სამშობლოს, სამშობლომ უნდა დაიცვას მისი ოჯახი სახელმწიფოს ღირსების საქმეა ღირსეულად დააფასოს ყველა ის გმირი, ჩვენი შვილები თუ მამები, ვინც საქართველოს ტერიტორიული მთლიანობისთვის თავი გაწირა. სიმბოლურია, რომ დღეს ჩვენი 7 გმირი, მივაბარეთ მიწას. გაცნობთ საქართველოს პრემიერ-მინისტრის, ბიძინა ივანიშვილის ინიციტივას, რომელსაც საქართველოს მთავრობამ დაუჭირა მხარი, ჩვენი გმირი ბიჭის ოჯახების მხარდაჭერის შესახებ. საქართველოს ტერიტორიული მთლიანობისთვის ჩვენი დამოუკიდებლობისთვის, ერთინაობისთვის ბრძოლაში დაღუპული ყველა გმირის ოჯახი დაწყებული აფხაზეთის საბრძოლო მოქმედებებიდან და დასრულებული დღეს მიმდინარე საერთაშორისო ოპერაციებით, მიიღებენ ყოველთვიურად 1000 ლარს. ეს ცვლილება განხორციელდება ორ ეტაპად, დაიწყება 2014 წელს და 2015 წელს დასრულდება. ასევე ცვლილებები შედის კანონში სამხედრო მოსამსხურის შესახებ. ამიერიდან, საბრძოლო მოქმედებების დროს გარდაცვლილი სამხედრო მოსამსაურის ოჯახი ნაცვლად 15 ათასისა, მიიღებს 100 ათას ლარს ერთჯერად დახმარებას. საქართველოს შეიარაღებული ძალების დევიზია – სამშობლო, ღირსება, ერთგულება. საქართველოს მთავრობა ყველაფერს აკეთებს იმისთვის, რომ ღირსეულად დაფასდნენ ის გმირები, ვინც ჩვენ სამშობლოს ბოლომდე უერთგულა", – აღნიშნულია მიმართვაში.