Bu gün Tiflisdə “Dünyadakı sarsıntılar dönəmində kim duruş gətirəcək?” mövzusunda ikigünlük Beynəlxalq Qafqaz Media Forumu başlayıb.

APA-nın Gürcüstan bürosunun məlumatına görə, tədbir "Qruziya i mir" qəzetinin və Rusiyada fəaliyyət göstərən "Sever-Yuq" Siyasi Mərkəzinin təşəbbüsü və təşkilatçılığı ilə keçirilir. Foruma Cənubi Qafqaz ölkələri, Rusiyadan olan KİV nümayəndələri, beynəlxalq təşkilatların rəhbərləri və ekspertlər qatılıb.

"Sever-Yuq" Siyasi Mərkəzinin direktoru Yuliya Yakuşeva çıxışında forumun artıq üçüncü dəfədir, keçirildiyini qeyd edib. Tədbirdə "Danışır Moskva" radiostansiyasının direktoru Vladimir Mamontov "Hökmranlıq əsrinin sonu" adlı məruzə ilə çıxış edib. Məruzə ilə bağlı forum iştirakçılarının sualları cavablandırılıb.

Forum çərçivəsində panellərdə diskussiya və gənc jurnalistlərlə ineraktiv oyunlar təşkil olunacaq.

Tədbir sabah davam edəcək.

Tədbirdə iştirak edən APA İnformasiya Agentliyinin baş direktoru Nurşən Quliyev jurnalistlərə forumun regionda və dünyada baş verən hadisələr fonunda aktual olduğunu bildirib: "Burada əsasən, Cənubi Qafqaz ölkələrinin media nümayəndələri iştirak edir və bu cəhətdən istər Azərbaycanda, istər Ermənistanda, istərsə də Gürcüstanda baş verənləri müzakirə etmək üçün şərait yaranıb. Bizim üçün bu forum Azərbaycan həqiqətlərinin çatdırılması baxımdan faydalı meydan sayıla bilər”

Gürcüstanda azərbaycanlıların yığcam yaşadıqları Marneuli rayonunda müasir tədris mərkəzi açılıb.

“Report”un Gürcüstan bürosu xəbər verir ki, bu rayonda yaşayan azərbaycanlıların təşəbbüsü ilə fəaliyyətə başlayan mərkəz soydaşlarımızın gürcü dilini öyrənmələrində və yerli ictimaiyyətə inteqrasiyasında mühüm rol oynayacaq.

Mərkəzin açılış mərasimində Kvemo-Kartli bölgəsinin qubernatoru Paata Xizanişvili, Marneuli Rayon İcra Hakimiyyətinin başçısı Merab Topçişvili, Gürcüstan parlamentinin deputatları Ruslan Hacıyev və Tamaz Naveriani, rayon bələdiyyəsinin sədri Nəbi Abdullayev, barış və inteqrasiya məsələləri üzrə dövlət nazirinin müşaviri Zaur Darğalı, Azərbaycanın bu ölkədəki səfirliyinin humanitar və mədəniyyət məsələləri üzrə müşaviri Samirə Ağayeva iştirak ediblər.

Paata Xizanişvili Marneulidə yaşayan milli azlıqların gürcü dilini öyrənmələrində bu mərkəzin müstəsna roy oynayacağını bildirib və mərkəzin azərbaycanlıların təşəbbüsü ilə açılmasını nümunəvi addım kimi qiymətləndirib.

Merab Topçişvili deyib ki, mərkəz xalqlarımız arasında dostluq əlaqələrini daha da möhkəmləndirəcək.

Samirə Ağayeva mərkəzin açılışını “Bilik günü” adlandırıb, uşaqların və yeniyetmələrin müasir standartalara uyğun metodlarla təhsil alacaqlarına inamını ifadə edib.

Digər natiqlər də mərkəzin fəaliyyətə başlamasını əlamətdar hadisə adlandırıb, yeniyetmə və gənclərin asudə vaxtlarının səmərəli təşkilində xüsusi əhəmiyyət kəsb etdiyini vurğulayıblar. 

Qeyd edək ki, Qrinviç Təhsil Mərkəzi ilk dəfə Gəncə şəhərində fəaliyyətə başlayıb. Hazırda mərkəzin Gəncə və Bakı şəhərində ofisləri fəaliyyət göstərir.