Ermənistan mediası dekabrın 24-dən 25-nə keçən gecə Azərbaycan Silahlı Qüvvələrinin cəbhə xəttində kəşfiyyat-diversiya cəhdi etdiyini bildirib. Ermənistan tərəfi bəyan edib ki, guya bu cəhdin qarşısı alınarkən Azərbayac ordusu itki verib. Lakin Azərbaycan Müdafiə Nazirliyi yayılan məlumatları Ermənistanın növbəti təxribatı adlandırıb və bu addımı informasiya müharibəsinin zəminində aparılan təbliğat kimi dəyərləndirib.

Cəbhə xəttində insidentin olması ilə bağlı ermənilərin tirajladığı informasiyaları Moskva Dövlət Universitetinin İnformasiya-Analitik Mərkəzinin baş direktor müavini, politoloq Andrey Petrov şərh edib.

Modern.az saytının məlumatına görə Andrey Petrov bildirib ki, Ermənistan qoşunların təmas xəttində gərginliyi artırır və sülh prosesi ilə bağlı aparılan danışıqlara zərbə vurur.

Analitik vurğulayıb ki, hər hansı kəşfiyyat-diversiya hərəkətləri ilə bağlı faktları yoxlamaq çətin deyil. Onun sözlərinə görə hansı tərəf itki verirsə, həlak olan hərbçilərin cəsədləri ortada olmalıdır.

“Ermənistan Müdafiə Nazirliyinin bəyanatlarında isə buna oxşar nəsə deyilmir. Azərbaycan Müdafiə Nazirliyi isə qoşunların təmas xəttində ölüm halı olan kimi bunu açıqlayır”.

Ekspert hesab edir ki, ATƏT diversiya hərəkətləri olduğu iddia olunan ərazilərdə yayılan xəbərləri təsdiq və ya təkzib etmək monitorinq apara bilər. Siyasi təhlilçi qeyd edib ki, “diversiyalar” yalnız kağız üzərində qalır.

Politoloqun fikrincə, Ermənistanın kəşfiyyat cəhdlərinin olması ilə bağlı yaydığı məlumatların məqsədi iqtisadi-sosial vəziyyətədən əziyyət çəkən erməni əhalisinin fikrini yayındırmaqdır.

“Faktiki olaraq Qarabağ, fəlakətli iqtisadi vəziyyətdən əziyyət çəkən Ermənistan əhalisinin fikrinin yayındırılması üçün yaxşı mövzudur. Bu gün Ermənistanın yerli KİV-i günbəgün əhaliyə ölkəndə böhran, işsizlik hökm sürür. Belə bir məqamda “bizdə şanlı ordu var və bu, diversiyanı zərərsizləşdirdi” kimi informasiyalar dövriyyəyə buraxılır. Çünki Ermənistanın özündə heç kəs bu cür məlumatları, xüsusilə Ermənistan ordusunda itkilərin olmadığı haqqında informasiyaları yoxlamayacaq. Dağlıq Qarabağ münaqişəsi Ermənistan rəhbərliyinin imicinə müsbət təsir göstərir”,-deyə Andrey Petrov şərh edib.

“Azərbaycanın çox zəngin tarixi vardır. Azərbaycan alimləri də, Azərbaycan ictimaiyyəti də bunu yaxşı bilirlər”. Modern.az saytı xəbər verir ki, bunu Prezident İlham Əliyev AMEA-nın 70 illik yubileyinə həsr olunmuş ümumi yığıncaqda çıxış edərkən bildirib.

Prezident daha sonra vurğulayıb ki, biz öz tariximizi, bu reallıqları dünya miqyasında daha da dolğun təqdim etməliyik: “Nəyə görə? İlk növbədə, bizi tanısınlar, görsünlər ki, nə qədər zəngin tariximiz var. Digər tərəfdən, bizə qarşı təxribatlar aparılır. Yəni, Azərbaycan tarixini ermənilər təhrif etməyə çalışırlar və diaspor imkanlarından istifadə edərək, bəzi hallarda buna nail olurlar. “Erməni alimləri” xüsusilə regionun, Cənubi Qafqazın tarixi ilə bağlı yalan, uydurma əsasında kitablar dərc edirlər, təqdimatlar keçirirlər. Əlbəttə ki, bizim tariximiz bizim böyük sərvətimizdir. Bizim tariximiz onu göstərir ki, azərbaycanlılar bu torpaqda əsrlər boyu yaşamışlar. Bugünkü Ermənistan tarixi Azərbaycan torpaqlarında yaradılıbdır. Təkcə XX əsrin əvvəllərində çar Rusiyası tərəfindən dərc edilmiş xəritələrə baxmaq kifayətdir hər kəs görsün ki, indiki Ermənistan ərazisində yerləşən kəndlərin, şəhərlərin mütləq əksəriyyətinin adları Azərbaycan mənşəlidir. Budur reallıq. İrəvan xanlığının əhalisinin 70-80 faizi azərbaycanlılar olubdur. Çox şadam ki, mənim tövsiyəmlə İrəvan xanlığı haqqında çox sanballı elmi əsər yaradılıb, bir neçə xarici dilə tərcümə edilibdir. Bu əsərlər faktlar, həqiqətlər üzərində yaradılır”.

Prezident qeyd edib ki, Dağlıq Qarabağ əzəli Azərbaycan torpağıdır: “Qarabağ”, “Xankəndi” Azərbaycan sözləridir. Mən dəfələrlə bildirmişəm ki, əgər Xankəndinin hər hansı bir tarixi adı olsaydı ermənilər o adı bərpa edərdilər. Onun “Stepanakert” adı bolşevik erməni quldur dəstəsinin rəhbəri Stepan Şaumyanın şərəfinə qoyulubdur. Yəni, bunu biz hamımız bilirik, amma dünya da bilməlidir. Hər yerdə bilməlidirlər ki, bu, bizim torpağımızdır, bizim haqqımız var o torpaqda yaşamağa. Beynəlxalq hüquq təbii ki, bizim mövqeyimizi müdafiə edir. Ancaq bütün dünya ictimaiyyəti bilməlidir ki, təkcə beynəlxalq hüquqla məsələ məhdudlaşmır. Bu, bizim tarixi, əzəli torpağımızdır. Ermənilər Dağlıq Qarabağa və bəzi başqa yerlərə XIX əsrdə İrandan, Şərqi Anadoludan köçürülmüşlər. Hansı məqsədlə köçürülmüşlər biz bunu yaxşı bilirik. Bütün bunları biz gərək kitablar formasında daha da geniş şəkildə yayaq və beləliklə, bütün dünyaya sübut edək ki, bu, bizim tarixi, əzəli torpağımızdır. Hesab edirəm, vaxt gəlib çatıb ki, müstəqillik dövrünə həsr edilən sanballı elmi əsər də yaradılsın. Gələn il biz müstəqilliyimizin 25 illiyini qeyd edəcəyik. Hesab edirəm ki, o vaxta qədər əgər belə sanballı elmi əsər yaradılarsa, bayramımıza çox yaxşı töhfə ola bilər”.