საქართველოს ახლადარჩეულმა პრეზიდენტმა, გიორგი მარგველაშვილმა საპრეზიდენტო ფიცი დადო. 

"ღვთისა და ერის წინაშე ვაცხადებ, რომ დავიცავ საქართველოს კონსტიტუციას, ქვეყნის დამოუკიდებლობას, ერთიანობასა და განუყოფლობას. კეთილსინდისიერად აღვასრულებ პრეზიდენტის მოვალეობას, ვიზრუნებ ჩემი ქვეყნის მოქალაქეთა უსაფრთხოებასა და კეთილდღეობისათვის. ჩემი ხალხისა და მამულის აღორძინებისა და ძლევამოსილებისათვის," - განაცხადა მარგველაშვილმა.

ფიცის დადების შემდეგ გიორგი მარგველაშვილმა საპრეზიდენტო სიტყვა წარმოთქვა და ქვეყნის შიდა და საგარეო პრიორიტეტებთან დაკავშირებითაც ისაუბრა. 

საქართველოს პრეზიდენტის ინაუგურაცია 13:00 საათზე დაიწყო. ის რუსთაველის გამზირზე, პარლამენტის შენობის ეზოში გაიმართა და ქართველ პოლიტიკოსებთან ერთად, 53 ქვეყნის წარმომადგენლებიც დაესწრო. 

ინაუგურაციის ცერემონიალის დასრულების შემდეგ, საქართველოს პრეზიდენტმა, გიორგი მარგველაშვილმა საქართველოს ერთიანობისა და თავისუფლებისთვის დაღუპულ მეომრების ხსოვნას პატივი მიაგო.