მსოფლიოს ერთ-ერთი ყველაზე ცნობილი კონკურსის "მის მსოფლიო-2013"-ის გამარჯვებული ფილიპინელი ლამაზმანი მეგან იანგი გახდა.
ინდონეზიაში ჩატარებულ კონკურსში 130 ქვეყნის გოგონები მონაწილეობდნენ. ტოპ-ათეულში განას, იამაიკის, ესპანეთის, ინდონეზიის, ინგლისის, ნეპალის, საფრანგეთის, ავსტრალიის, ბრაზილიის და ფილიპინების წარმომადგენლები მოხვდნენ. ფინალურ ტურში კი ტოპ-ხუთეული გამოვლინდა (საფრანგეთი, ფილიპინები, განა, ბრაზილია და ესპანეთი). ამდენად, ჩატარებულ კონკურსზე პირველ ადგილზე ფილიპინები, მეორე ადგილზე საფრანგეთი, მესამე ადგილზე კი განას რესპუბლიკა გავიდნენ.
ტრადიციის თანახმად, კონკურსის გამარჯვებულს გვირგვინი წინა წლის "მის მსოფლიო 2012"-ის გამარჯვებულმა იაპონიის ლამაზმანმა გადასცა.
აღსანიშნავია, რომ ფილიპინელი მის მსოფლიო მეგან იანგი აშშ-ში დაიბადა, მაგრამ ბავშვობიდან ფილიპინებში ცხოვრობდა.
შეგახსენებთ, რომ 180-ზე მეტ ქვეყანაში პირდაპირ ეთერში გასული კონკურსის ინდონეზიის ჩატარება ადგილობრივი მუსლიმების პროტესტის მიზეზი გახდა. ამ მიზეზის გამო პირველად მონაწილეები ტრადიციულ საცურაო კოსტუმებში არ გამოსულან. დიდი ბრიტანეთის და აშშ-ის ინდონეზიაში საელჩოებმა ქვეყანაში ლამაზმანების უსაფრთხოების დასაცავად კონკურსზე 700-ზე მეტი პოლიციელი ჩართეს.