Qara Dəniz İqtisadi Əməkdaşlıq Təşkilatında (QDİƏT) sədrlik 6 ay müddətinə Ermənistandan Bolqarıstana keçib.

 Bolqarıstanın xarici işlər naziri Kristian Viqenin bildirib ki, təşkilatda sədrlik dövründə onun təmsil etdiyi ölkənin əsas prioritetləri QDİƏT-in müxtəlif beynəlxalq və regional təşkilatları ilə əməkdaşlığın genişləndirilməsi, enerji, nəqliyyat, turizm, ekoloji sahələrində birgə layihələrin həyata keçirilməsi olacaq.

K.Viqenin əlavə edib ki, Bolqarıstan QDİƏT ilə Avropa Birliyi arasında əlaqələrin inkişaf etdirilməsi istiqamətində də çalışacaq.

QDİƏT 1992-ci il iyunun 5-dən fəaliyyətinə başlayıb. Təşkilata Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova, Rumıniya, Rusiya, Türkiyə və Ukrayna daxildir. Azərbaycan 2009-cu ilin ikinci yarısında QDİƏT-ə sədrlik edib.

“Böyük 20-lik”in sammitində iştirak edən ABŞ prezidenti Barak Obama Pentaqona Suriyaya endiriləcək zərbələrin hədəflərinin genişləndirilməsi barədə tələb ünvanlayıb. Modern.az “The New York Times” qəzetinə istinadən xəbər verir ki, Amerika kəşfiyyatının müəyyən etdiyi 50 hədəfin sayı artırılacaq. 
Obama administrasiyası ilk dəfə Amerika və Fransa təyyarələrinin Suriyaya zərbə endirəcəklərini açıqlayıb. Bundan öncə Suriyaya yalnız Aralıq dənizində yerləşən hərbi gəmilərdən zərbələrin endirilməsi təklif olunurdu. Əsas hədəflərin Suriyanın hava hücumundan müdafiə sistemlərinin, komanda qərargahlarının və silah anbarlarının olacağı deyilir.

Ağ Evdən mətbuata sızan məlumatlara görə, Barak Obamanın Suriyaya mümkün hərbi əməliyyatlarla bağlı Amerika xalqına müraciəti hazırlanıb. İctimai təşkilatların keçirdiyi sorğu isə Amerika əhalisinin əksəriyyətinin hərbi əməliyyatlara qarşı olduğunu göstərir. Rəyi soruşulan amerikalıların 48%-i Suriyaya raket zərbələrinin endirilməsini dəstəkləmir. 74% respondentin fikrincə, hərbi əməliyyatlar Amerikaya və müttəfiqlərinə regionda neqativ münasibətə səbəb olacaq.