Sentyabrın 7-də Gürcüstanda Şərabçılıq Turizmi I Qlobal Konfransı işə başlayıb. Konfrans Dünya Turizm Təşkilatının (DTT) Gürcüstan Milli Turizm Administrasiyası ilə birgə əməkdaşlığı şəraitində keçirilir.

Tədbirdə çıxış edən Gürcüstanın Baş naziri Giorgi Kvirikaşvili ölkəsinin böyük turizm potensialına malik olduğunu bildirib. Baş nazir deyib ki, şərabçılıq turizmi tələbatın şaxələndirilməsi üçün böyük imkanlar yaradır. Bu baxımdan Gürcüstanda mövcud potensial hamıya yaxşı məlumdur. Biz DTT-nin Şərabçılıq Turizmi I Qlobal Konfransını ölkəmizdə keçirməsindən məmnunuq.

Baş nazir turizmin inkişafı və bu sahədə region ölkələri ilə əməkdaşlığın faydalı olduğunu bildirib. O, qonşu ölkələrlə turizm sahəsində əməkdaşlığın gücləndirilməsinin əhəmiyyətini qeyd edib.

DTT-nin baş katibi Taleb Rifahi turizmin inkişaf perspektivləri və bu sahədə gəlirlər barədə ətraflı məlumat verib.

Sentyabrın 9-dək davam edəcək konfransın sessiyaları ölkənin Kaxeti bölgəsindəki müxtəlif şərabçılıq zavodlarında keçiriləcək. İştirakçılara ekspertlərlə diskussiyalarda iştirak etmək imkanı yaradılacaq.

Konfransda 42 ölkədən, o cümlədən Azərbaycandan 250 nümayəndə və ekspert iştirak edir.

Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə regiondakı müsəlmanlar adından dünya dini liderlərinə, parlamentlərə, beynəlxalq təşkilatlara və İnsan Hüquqları üzrə Avropa Məhkəməsinə rəsmi müraciət ünvanlayıb.

Dalgatv-nin  APA-ya istinadən verdiyi xəbərə görə, müraciət müraciətdə bildirilir: “Milyonlarla azərbaycanlının iradə və hisslərini ifadə edərək Azərbaycanın Xocalı şəhərində törədilmiş soyqırımın 22-ci ildönümü ərəfəsində dinindən, dilindən, irqindən və milli mənsubiyyətindən asılı olmayaraq bütün dünya ictimaiyyətinə müraciət edirik. Əminik ki, ümumbəşəri dəyərlərə zidd olan zorakılıq, təcavüz, qətliam kimi cinayət əməllərinə heç bir cəmiyyət, heç bir din haqq qazandırmır. Tarixi gerçəklik ondan ibarətdir ki, 1992-ci il fevralın 25-dən 26-na keçən gecə minlərlə dinc, silahsız, müdafiəsiz Xocalı sakini erməni qəsbkarlarının qəfil və amansız basqınına məruz qalıb, 613 nəfər xüsusi qəddarlıqla qətlə yetirilib, qocalara, uşaqlara, hamilə qadınlara belə rəhm olunmayıb. Nəticə etibarilə 150 nəfər də itkin düşüb, 1275 nəfər əsir götürülərək ağır işgəncələrə məruz qalıb, şəhid edilənlərin cəsədləri üzərində ağlasığmaz təhqiramiz hərəkətlər törədilib. Zaman-zaman Azərbaycan xalqına qarşı etnik təmizləmə, fiziki və maddi-mənəvi terror gerçəkləşdirən erməni ekstremistləri ərazimizin 20 faizini işğal edərək, bir milyondan artıq azərbaycanlını doğma yurdlarından didərgin salıb, qəsb etdikləri Qarabağ torpaqlarında vandalizm aktları həyata keçirərək tarixi, dini və mədəniyyət abidələrimizi xarabalığa çeviriblər. Təəssüflər olsun ki, onlar törətdikləri cinayətlərə görə hələ də layiqli cəza almamış, Birləşmiş Millətlər Təşkilatının Təhlükəsizlik Şurasının 4 məlum qətnaməsinə belə məhəl qoymayıblar. Xocalıda həyata keçirdikləri məqsədyönlü soyqırımı aktı isə onların törətdikləri vəhşiliklərin kulminasiya nöqtəsidir. Azərbaycan illərdir Xocalı soyqırımı faktının lazımi səviyyədə siyasi, hüquqi qiymətini alması, beynəlxalq miqyasda qınaq obyektinə çevrilməsi ilə bağlı müraciətlər edir. Ümidlərimizi artıran məqam isə bundan ibarətdir ki, artıq dünyanın bir sıra dövlətləri və beynəlxalq təşkilatları Xocalı soyqırımı həqiqətlərini tanıyıb və tanımaqdadır. Bu gün geniş vüsət alan “Xocalıya ədalət” kampaniyası Azərbaycan həqiqətlərinin beynəlxalq səviyyədə yayılmasında, qəsbkarın əsl simasının açılmasında, haqqın və tarixi ədalətin bərpasında önəmli rol oynayır. Qafqaz Müsəlmanları İdarəsi dünya ictimaiyyətini erməni ekstremistlərinin məkrli təbliğatına uymamağa, özgə torpaqlarına göz dikən təcavüzkar dövlətin törətdiyi insan əxlaqına, beynəlxalq hüquqa zidd qanlı qırğını - Xocalı soyqırımı faktını öz adı ilə çağırmağa və pisləməyə səsləyir. Belə ki, bütün səmavi dinlərin müqəddəs kitablarında, o cümlədən “Qurani-Kərim”də bir günahsız insanın qətlə yetirilməsinin günahı bəşəriyyətin məhvinin günahına bərabər tutulur. Biz, din xadimləri olaraq, bütün dünya xalqlarına sülh, səadət, əmin-amanlıq və rifah diləyirik. Hər birimizin Rəbbimiz qarşısında, bəşəriyyət qarşısında vicdan naminə müqəddəs borcumuz ədalətin bərqərar olmasına nail olmaqdır. Odur ki, üzümüzü bir daha dünyanın dini liderlərinə, parlamentlərinə, beynəlxalq təşkilatlara, o cümlədən, İnsan Hüquqları üzrə Avropa Məhkəməsinə tutaraq, onları Azərbaycan xalqına qarşı erməni ekstremistlərinin təcavüzünə və vəhşiliklərinə prinsipial siyasi, hüquqi qiymət verməyə, Xocalıda törədilən cinayəti insanlığa qarşı soyqırımı aktı kimi tanımağa çağırırıq. Qoy Uca Yaradan hamımıza savab əməllərdə, düzgünü yanlışdan seçməkdə və ədalətli olmaqda yardımçı olsun! Amin!”