Yevlax-Zaqatala-Gürcüstan magistral yolunda baş verən yol qəzasında bir nəfər ölüb, bir nəfər isə xəsarət alıb.

Qəza bu gün səhər saatlarında Yevlax-Zaqatala-Gürcüstan magistralının 96-cı  km-də, Qax rayonunun Qorağan kəndi ərazisindən keçən hissəsində baş verib.

Zaqatala rayonu istiqamətində hərəkətdə olan, Zərdab rayon sakini, 1978-ci il təvəllüdlü Hacızadə Kamal Əyyub oğlunun idarə etdiyi “Hyundai-Elantra” markalı, 63 BB 610 nişan dövlət nömrəli avtomobil idarəetməni itirərək yolun kənarındakı qoz ağacına çırpılıb.

Qəza zamanı avtomobildə yanğın baş verib. Yanğın nəticəsində avtomobilin yanar konstruksiyaları yanaraq yararsız hala düşüb. 

Qəza nəticəsində avtomobilin sürücüsü və avtomobildə olan sərnişin, Zərdab rayon sakini, 1982-ci il təvəllüdlü İsmayılov Rauf Kamil oğlu aldıqları müxtəlif dərəcəli bədən xəsarətləri alıb.

R. İsmayılov xəstəxanaya aparılarkən yolda ölüb, K. Hacızadə isə Qax Mərkəzi Rayon Xəstəxanasının reanimasiya şöbəsinə yerləşdirilib.

Qax MRX-dan verilən məlumata görə, K. Hacızadənin vəziyyəti orta-stabil hesab edilir.

Faktla bağlı Daxili İşlər Nazirliyinin (DİN) Baş Dövlət Yol Polisi İdarəsinin təhqiqat və istintaq bölməsində cinayət işi başlayıb, araşdırma aparılır.

 "Azərbaycan ixracımız baxımından bizim üçün mühüm ölkədir. Biz neftimizin təxminən 30 faizini Azərbaycandan idxal edirik".

"Dalğa TV"  xəbər verir ki, bu sözləri sentyabrın 15-də Bakıda səfərdə olan Çexiya prezidenti Miloş Zeman Azərbaycan prezidenti İlham Əliyev ilə keçirdiyi birgə mətbuat konfransında deyib.

Bununla belə, o qeyd edib ki, Azərbaycan digər səbəblərə görə də onlar üçün yaxın ölkədir:

"Əhalimizin sayı demək olar ki, eynidir. İqtisadi artım tempi kifayət qədər məqbuldur. İşsizliyin səviyyəsi isə aşağıdır. Lakin bir məsələni də qeyd etmək istərdim. Prezident Əliyev təvazökarlıq baxımından onu demədi. Azərbaycan öz öhdəliklərini yerinə yetirən ölkədir. Sizi əmin edə bilərəm ki, Azərbaycanda olan əla maliyyə durumu heç də bütün ölkələrdə yoxdur. Mənə bildirildi ki, Azərbaycan ərazisində apardığımız fəaliyyətin sığortalanmasına gəldikdə, heç bir işin pozulması və ya sığorta halı olmayıb. Cənab Prezident, mən bunu yüksək dəyərləndirirəm. Bütün bunlar hamıya aydın olan, lakin adı çəkilməyən ölkələrlə müqayisədə Azərbaycana olan etimadı daha da artırır.

Miloş Zeman bildirib ki, "biz, həmçinin bir sıra iqtisadi və ticari məsələləri müzakirə etdik".

"Qeyd etmək istərdim ki, Çex iş adamları Bakı-Tbilisi-Qars dəmir yolu xəttinin birinci mərhələsinə uğurla sərmayə qoyublar. Artıq tikintinin ikinci mərhələsi başlayır. Ümidvaram ki, bu sahədə də əməkdaşlığımız uğurlu olacaq. İnfrastruktur baxımından bu layihə kifayət qədər genişmiqyaslıdır. Azərbaycanın ikinci şəhəri Gəncənin icra hakimiyyətinin başçısı şəhər nəqliyyatı, o cümlədən aşağı gərginlik tramvayları ilə bağlı Çex Respublikasına müraciət edib. Çünki heç kəsin xətrinə dəyməmək üçün bildirim ki, adı çəkilməyən ölkənin verdiyi ilk təklif qəbuledilməz idi. Çexiyanın təklifi daha münasib oldu. Əlbəttə ki, işlədiyimiz ənənəvi sahələr, xüsusən də müdafiə sənayesi, eləcə də Azərbaycanın polis qüvvələri üçün istər radar, istərsə də digər silah növləri baxımından əməkdaşlığa hazırıq".

Çexiya prezidenti vurğulayıb ki, "iki ölkə arasında imzalanmış sənəddə göstərildiyi kimi, biz kənd təsərrüfatı sahəsində əməkdaşlığa açığıq. Bildiyimiz qədər, bu sahədə Azərbaycan öz məhsullarının bir hissəsini ixrac edir və bu baxımdan özünü təmin edən ölkədir. Bundan əlavə, onlarla digər nümunə gətirə bilərəm. Lakin, fikrimcə, onlar haqqında biz sabah biznes forumda söhbət aça biləcəyik. Hamınızı həmin tədbirdə görməyi arzulayıram. Sabah bu haqda daha dolğun danışacaq şəxsləri qabaqlamaq istəməzdim".

O yekun olaraq bildirib ki, "mən cənab prezidenti Çexiyaya səfərə dəvət etdim. Qeyd edim ki, prezidentin rəhbərliyi altında Çex Respublikasına da bir sıra Azərbaycan sərmayələri qoyulsa, çox şad olaram".

Onun sözlərinə görə, Çexiyada mehmanxanalar və kurortlar, investisiya baxımından digər münasib məkanlar var.

"Tam əmin ola bilərsiniz ki, Çexiyada qoyulmuş maliyyə sərmayələri özünü doğruldacaq. Çex Respublikası bu baxımdan Mərkəzi Avropada kifayət qədər təhlükəsiz yerdir. Təbii ki, digər tədbirlər çərçivəsində də görüşəcəyik. Lakin Praqada gələcək görüşümüzü səmimiyyətlə arzulayıram. İnanıram ki, bu görüş baş tutacaq və həmin görüşdə atılmış yeni iqtisadi addımları qeyd edə biləcəyik".