Bu gün Brüsseldə Avropa Birliyi-Azərbaycan Əməkdaşlıq Şurasının 14-cü iclası keçirilib. APA-nın xəbərinə görə, iclasda əməkdaşlığın cari vəziyyəti və perspektivləri müzakirə olunub.

Toplantının yekunları əsasında keçirilən mətbuat konfransında AB-yə sədrlik edən ölkə olan Litvanın xarici işlər naziri Linas Linkyaviçyus bildirib ki, AB ilə Azərbaycan arasında münasibətlər dinamik inkişaf edir: “Biz Azərbaycanla AB arasında yaxınlaşmanı görməkdən məmnunuq”.

L. Linkyaviçyus Azərbaycan və Ermənistan prezidentlərinin bu yaxınlarda keçirilmiş görüşünü alqışlayıb və qeyd edib ki, Dağlıq Qarabağ münaqişəsinin həlli AB-nin xarici siyasət prioritetlərindən biridir və Brüssel ATƏT-in Minsk Qrupunun dəstəklənməsi üçün daha çox iş görməyə hazırdır. O, Azərbaycan və AB-nin enerji əməkdaşlığını fəal inkişaf etdirdiyini söyləyib və “Şahdəniz” konsorsiumunun yekun investisiya qərarının dekabrın 17-də açıqlanmasını səbirsizliklə gözlədiklərini vurğulayıb. Tərəflər Transxəzər qaz xətti layihəsi üzrə müzakirələri davam etdirməyə qərar veriblər.

Qeyd edək ki, AB-Azərbaycan Əməkdaşlıq Şurasının iclasları ildə bir dəfə nazirlər səviyyəsində keçirilir və tərəflər arasında siyasi dialoqun tərkib hissəsidir. Əməkdaşlıq Şurası AB ilə tərəfdaş ölkələr arasında əməkdaşlıq və tərəfdaşlıq barədə sazişin yerinə yetirilməsi işini əlaqələndirir. Azərbaycan və AB arasında bu saziş 1999-cu ildən qüvvədədir.

Özbəkistan prezidenti İslam Kərimovun qızı, adı qalmaqallarda hallanan Gülnarə Kərimova gəzinti zamanı yoldan 200 dollar tapıb.

Bu barədə məlumatı prezidentin qızı sosial şəbəkədəki səhifəsində yazıb. Onun sözlərinə görə, pulu adi bir Daşkənd küçəsindən tapıb. Prezident qızı pulun sahibinə səslənərək küçənin adını çəkməklə pulu ona qaytara biləcəyini deyib. Daha sonra isə o, tapdığı pulların fotosunu yayıb. Beləliklə də o, pulu itirən şəxsə yardımçı olmaq istəyib.

“Uzmetronom” saytı bu xəbərin ölkədəki sosial vəziyyətin yaxşı olmasının göstəricisi kimi şərh edib. Saytın yazdığına görə, Özbəkistanda vəziyyət o qədər yaxşıdır ki, insanlar adi küçədə 200 dollar itirir və onu axtarmırlar. Qeyd edək ki, Özbəkistanda orta aylıq əmək haqqı 200 dollardır.