Gürcüstanın Kaxeti bölgəsinin Telavi rayonundakı Lopata kəndində “Şərq tərəfdaşlığı” ölkələrinin ərazi əməkdaşlığına dair regional konfrans keçirilmişdir.
Azərbaycanın və Gürcüstanın dövlət strukturlarının, qeyri-hökumət təşkilatlarının, kütləvi informasiya vasitələri nümayəndələrinin qatıldıqları tədbirdə “Şərq tərəfdaşlığı” ölkələrinin ərazi əməkdaşlığı proqramının strategiyası məsələsi müzakirə olunmuşdur.
Toplantını proqramın rəhbəri Aleksey Sakaryev açmışdır. Avropa və Avratlantikaya inteqrasiya məsələləri üzrə Gürcüstanın dövlət nazirinin müavini Məryəm Rekviaşvili Azərbaycan-Gürcüstan münasibətlərinin uğurla davam etdirilməsindən, birgə iqtisadi layihələrin həyata keçirilməsindən və digər aktual məsələlərdən söhbət açmışdır. Nazir müavini bu tədbirin sərhədyanı ərazilərdə əməkdaşlığın inkişafına münbit şərait yaradacağına əmin olduğunu vurğulamış, ölkəsinin bu istiqamətdə əməkdaşlığa hazır olduğunu bildirmişdir.
Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının təmsilçisi Sahib Məmmədov diqqəti sərhədyanı əməkdaşlığın vacibliyinə, mülki cəmiyyətin bu proseslərdə iştirakının əhəmiyyətinə cəlb etmişdir. O qeyd etmişdir ki, Azərbaycanda xeyli sayda gürcü, Gürcüstanda isə azərbaycanlı yaşayır. Bizim birgə dəyərlərimiz vardır, onların qorunub saxlanmasına, daha da inkişaf etdirilməsinə çalışmalıyıq.
Azərbaycan Respublikası İqtisadiyyat və Sənaye Nazirliyinin beynəlxalq təşkilatlarla əməkdaşlıq şöbəsi müdirinin müavini Ruslan Rüstəmli ölkəmizin regional əməkdaşlığın inkişafına böyük önəm verdiyini vurğulamış, Azərbaycan-Gürcüstan münasibətlərinin bunun daha səmərəli təşkilinə imkan verdiyini qeyd etmişdir.
Sonda “Şərq tərəfdaşlığı” ölkələrinin ərazi əməkdaşlığı proqramının strategiyası” layihəsinin təqdimatı keçirilmişdir.

Amerikada çıxan “The Jewish Times” qəzetinin 29 avqust tarixli nömrəsində “Dostlar arasında: Azərbaycan və İsrail” sərlövhəli məqalə dərc edilmişdir. Məqalənin müəllifi, jurnalist və Kaliforniya Universitetinin professoru Norma Zager yazır ki, tamdəyərli demokratik dünyəvi müsəlman dövləti olan Azərbaycan həm İsrailin, həm də ABŞ-ın etimadını və etibarını qazanmış müttəfiqdir, lakin Vaşinqton ona lazımınca diqqət yetirmir.
Müəllif yazır: “Avrasiyada və Yaxın Şərqdə İsrailin ən yaxın müttəfiqi olan Azərbaycan bütün dünyaya sübut edir ki, müsəlman mədəniyyəti və siyasi qurumlar barədə onların qərəzli təsəvvürləri yanlışdır. Yaxın Şərqi alov bürüdüyü bir vaxtda, görünür, amerikalı siyasətçilər bu mənzərənin nə qədər dəhşətli olmasını anlaya bilmirlər – təhlükəsiz dünya Amerikanın bombaları və qırıcı hərbi təyyarələri vasitəsilə yaradıla bilməz. Dünyamızın təhlükəsizliyi Qərb mədəniyyətinin, Qərb ticarətinin və Qərb ideallarının yayılması yolu ilə təmin edilməlidir.
N.Zager vurğulayır ki, həm İsrail, həm də Azərbaycan ABŞ tərəfindən nəzərəçarpacaq etinasızlıq səbəbindən əziyyət çəkir. ABŞ prezidenti bircə dəfə Azərbaycana səfər etsəydi, dünyaya bu ölkənin siyasi xəttini, onun İsraili, ABŞ-ı və Avropanı dəstəkləməsini hərtərəfli öyrənmək şansı verərdi. Azərbaycan bütün məsələlərdə və bütün etnik qruplara münasibətdə azadlıq və tolerantlıq siyasətini davam etdirir.
N.Zager sonda ABŞ-ı Azərbaycan, İsrail və Qərb arasında qarşılıqlı münasibətləri daha ətraflı öyrənməyə və Azərbaycan-İsrail münasibətlərindən nümunə kimi istifadə etməklə müsbət nəticə çıxarmağa çağırır.