Beynəlxalq İdman Məhkəməsi (CAS) Türkiyənin “Fənərbaxça” klubunun Avropa kuboklarında iki il iştirakına qoyulan qadağadan verilən apellyasiya şikayəti əsasında qərar çıxarıb. APA-nın məlumatına görə, CAS “Fənərəbaxça”ya verilmiş iki illik cəzanı qüvvədə saxlayıb. Qərarda bildirilir ki, UEFA “Fənərbaxçanı” danışılmış oyunların təşkili ittihamı ilə əlaqədar Avropa kuboklarında iştirakdan iki il müddətinə məhrum edib. Klubun verdiyi apellyasiya şikayəti ilə əlaqədar CAS UEFA-nın qərarının tətbiqini təxirə salıb, apellyasiya ilə bağlı qərar məlum olana kimi “Fənərbaxça”ya Çempionlar Liqası təsnifat mərhələsində iştiraka icazə verib.

CAS 21-22 avqust tarixlərində keçirilmiş dfinləmələrin nəticəsi olaraq UEFA-nın qərarını qüvvədə saxlayıb və qərar əsasında “Fənərbaxça” klubu iki il müddətinə Avropa klub turnirlərində iştirakdan məhrum edilib.

Azərbaycan akademik avarçəkəni Aleksandr Aleksandrov Cənubi Koreyanın Çunqju şəhərindəki dünya çempionatında yarımfinala yüksəlib.

Azərbaycan Avarçəkmə Federasiyasından ANS PRESS-ə verilən məlumata görə, 1 nəfərlik qayıqla (M1x) çıxış edən Aleksandrov ¼ final yürüşündə ilk “3-lük”ə düşməyi bacarıb.

Onun rəqibləri arasında 5 qat dünya çempionu və 2012-ci il London Yay Olimpiya Oyunlarının qalibi Meyh Drizdeyl (Yeni Zelandiya), eləcə də 2000-ci il Sidney olimpiadasının bürünc mükafatçısı, 2002-ci ilin dünya çempionu Marsel Hakker (Almaniya) də olub. Hakker finişə hamıdan tez – 6 dəqiqə 57,37 saniyəyə çatıb. 2-ci yeri 6 dəqiqə 59,78 saniyə nəticə göstərən Aleksandrov tutub. Bolqarıstanlı Georgi Bojilov isə 7 dəqiqə 0,21 saniyə göstərici ilə 3-cü olub. Hər 3 avarçəkən əsas yarımfinala vəsiqə qazanıb.