Gürcüstan Əmək, Səhiyyə və Sosial Yardım Nazirliyinin Sosial İnkişaf Agentliyinin rəhbəri Noy Kinkladze brifinqdə demişdir ki, gəlir xidməti agentliyə dövlətdən maddi yardım alan fərdi sahibkarların 2012-ci ildəki gəlirlərinə dair məlumat təqdim etmişdir. Alınan məlumatlar sosial cəhətdən müdafiə olunmayan ailələrə verilən yardımla müqayisə olunmuşdur.
Noy Kinkladzenin dediyinə görə, keçən il 1300-dən çox sahibkar ailəsi dövlətdən maddi yardım almışdır və onların illik gəlirləri sosial cəhətdən müdafiə olunmayan ailələr üçün müəyyən edilmiş minimumdan çox yüksəkdir. Onların arasında hətta bir milyonçu da vardır. Gəlir xidmətinin məlumatında Kutaisi şəhərindən olan sahibkarın illik gəlirinin 1 milyon laridən (1 dollar 1,65 laridir) çox olduğu göstərilir. Dörd fərdi sahibkar ailəsinin illik gəlirlərinin 500 mindən 1 milyon lariyədək, üç ailənin illik gəlirlərinin isə 300-500 min lari təşkil etdiyi bildirilmişdir. Yardım alanlar arasında illik gəliri 50 min laridən 300 min lariyədək olan çoxsaylı sahibkar ailəsinin də olduğu aşkarlanmışdır. Keçən il həmin ailələrə 1.167.356 lari məbləğində yardım olunmuşdur. Bu ilin avqust ayından etibarən onlara sosial yardım verilməsi dayandırılmışdır.
Agentliyin rəhbəri həmin ailələrin sosial-iqtisadi durumunun bir daha öyrəniləcəyini bildirmişdir.

Nabrandakı akvaparkda bədbəxt hadisə nəticəsində ciddi xəsarət alan azyaşlı İmran Cəfərzadənin Berlində reabilitasiyadan keçəcəyi "Sharite" adlı ən yaxşı klinika tapılıb.

Cümə axşamı Almaniyadan Bakıya ixtisaslaşmış həkimlərdən ibarət ambulans təyyarə uçacaq. Onlar uşağı 28 gün davam edəcək diaqnostika üçün xəstəxanaya aparacaqlar. Bu dövr ərzində Almaniyada bu sahənin ən yaxşı həkimlərinin bir neçə konsiliumu keçiriləcək. Azərbaycan Prezidenti İlham Əliyevin göstərişi ilə həmin həkimlərlə danışıqlar aparılıb.

Bu dövr ərzində ilkin olaraq 2-3 əməliyyat keçiriləcəyi istisna edilmir. Hazırda uşağın vəziyyəti yaxşılaşır. Uşaq uzun müddət hovuzda qaldığına görə onun ağciyərinə düşən su həkimlər tərəfindən çıxarılıb.

Azərbaycan Prezidenti İlham Əliyevin tapşırığına əsasən, Heydər Əliyev Fondu tərəfindən akvaparkda bədbəxt hadisə nəticəsində ciddi xəsarət alan azyaşlı İmran Cəfərzadəyə zəruri tibbi yardımın göstərilməsi üçün təşkilati məsələlərin icrasına başlanılıb.

İmran Cəfərzadə üzərində əməliyyatın keçirilməsi üçün Heydər Əliyev Fondu bütün xərcləri öz üzərinə götürəcək.