“Müsavat Partiyasının 8 il üzvü olmuşam. Siyasətə Müsavatla gəldiyimi inkar etmirəm. Başqanın müşaviri olmuşam. Bu qərarı təsadüfən vermədim. Cəmiyyətin maraqları daha vacibdir. Önəmli olan partiyalar deyil, Azərbaycandır. Bəzi dostlarımız bu istefanı Milli Şurada sədr aparatına təyinatla bağlamağa cəhd etdilər. Belə deyil”.

Bunu “Yeni Müsavat”a Müsavat Partiyasından istefa vermiş Yeganə Hacıyeva deyib.

Müsavat başqanının keçmiş müşaviri partiyadan gedəcəyi barədə 3 həftə əvvəl partiya yoldaşlarına söylədiyini də bildirib: “Bəzi üzvlərin arzuladıqlarını reallıq kimi qərara vermək istəyi anlaşılandır. Müsavatın bəzi funksionerlərinin partiyadan gedişimə verdiyi reaksiyalar məyusedici idi. Onlar bilirdilər ki, partiyadan gedəcəm. Buna bir günün içində qərar verməmişdim ki?! Amma çoxluq yazışmalarda qərarıma hörmətlə yanaşdıqlarını bildirdilər. O ki qaldı Müsavatın Milli Şuradan gedişinə, partiyanın bu birlik daxilində fəaliyyəti uğurlu olub. Bu qurumun uğurlarında Müsavatın danılmaz payı var.

Dünənə qədər partiya daxilində olan biri kimi deyirəm - sıravi üzvlərin əksəriyyəti Müsavatın Milli Şuradan çıxmasının əleyhinədirlər. Həbsdə olan Tofiq Yaqublu, Yadigar Sadıqov da Milli Şuradan getməyin əleyhinədirlər. Əgər bu baş verəcəksə partiya daxilində və cəmiyyətdə xəyal qırıqlığı yaşanacaq. Partiyaya qarşı güvən krizi yaşanacaq”.

Müsavat başqanı ilə istefasından əvvəl söhbət etdiyini deyən Y. Hacıyeva “bu qərarı verməyə təşviq ola biləcək bir söhbətimiz olmuşdu. Mənə fikirlərimi azad bildirmək üçün azad siyasətçi olmağım xatırladılmışdı. Bu barədə fikirləşəcəyimi bildirmişdim. Qərarımı da bu danışıqlardan 4 həftə sonra vermişəm. Yəni, ekspromt qərar deyildi” deyib.

“Sadaxlı kənd icra nümayəndəliyinin inzibati ərazi dairəsinə daxil olan Burma kəndindəyik. Erməni sərhədçilərinin girov götürdüyü Allahverdi Pələngovun ailəsi bu kənddə yaşayır. Məni Sadaxlı kənd mərkəzində Allahverdi Pələngovun qardaşı oğlu Anar Pələngov qarşıladı və polisin hadisə baş verən kəndə getdiyini dedi. Az sonra “Niva” markalı avtomobilin sürücüsü Mirzə Pələngov (sonra öyrəndim ki, o, girov götürülən şəxsin qardaşıdır) yaxınlaşdı, mənim kim olduğumu soruşdu və jurnalist olduğumu eşidəndə bildirdi ki, “bizə jurnalist lazım deyil, bizə hökumət adamı, polislər lazımdır. Qardaş sən geri qayıt, bizim işimizə mane olma, qoy polislə işimizi görək, ermənilər bilsə ki, bu məlumat mətbuata ötürülüb, qardaşımızın işi yaxşı olmaz”.

Gürcüstan-Ermənistan gömrük məntəqəsindən sağa burulub, təxminən 3 km yol gəldikdən sonra Burma kəndi başlayır. Ermənistan gömrük məntəqəsi ilə bu kəndi magistral yoldan cəmi 100-150  metr məsafə ayırır. Burma kəndinə çatanda yerli sakinlərin toplaşıb hadisəni müzakirə etdiklərini gördüm. Gürcüstanın “Gürcü Arzusu” partiyasının Siyasi Büro üzvü Əli Babayev və “Sadaxlı Dirçəliş İttifaqı” qeyri-hökumət təşkilatının sədri Sabir Mehdiyev  də  kənddə polislərlə hadisənin təfərrüatlarını öyrənməyə çalışırdı. Polislər Allahverdi Pələngövun həyat yoldaşından, oğlu Kənan  və hadisənin digər şahidlərindən izahat alırdı. Allahverdi Pələngövun evində olarkən qardaşı Mirzə Pələngov yenə mənim və “Sadaxlı Dirçəliş İttifaqı” qeyri-hökumət təşkilatının sədri Sabir Mehdiyevə kəndə gəlməmizə etiraz etdi və Allahverdi Pələngovun həyat yoldaşından açıqlama almağıma mane oldu. Mirzə Pənləngov şəkil çəkməyimə də etirazını bildirdi. Mən kənd sakini Vaqif Naibovun maşını ilə sərhədə gedərək Ermənistan sərhədçilərinin dayandığı sərhəd zolağını da çəkmək istədim. Vaqif Naibov bildirdi ki, 3-4 il bundan əvvəl ermənilər 1974-cü ilin qondarma xəritəsini əsas gətirərək meşəyə yaxın ərazidə kənd evlərinin yerləşdiyi ərazilərin Ermənistana aid olduğunu iddia edib və azərbaycanlıları dədə-baba evlərimizdən çıxartmaq istəyiblər: “Lakin biz mübarizə apardıq, müvafiq təşkilatlara müraciət etdik, bundan sonra evlərimizi vermədik. Lakin başımıza hələ də çox hadisələr gəlir”.

Allahverdi Pələngovun əmisi oğlu Süleyman Pələngov açıqlamasında girov götürülən şəxsin Ermənistan-Gürcüstan sərhədinin neytral sahəsində iki erməni çobanı ilə görüşdüyünü və birlikdə çörək yediklərini bildirib: “Sonra erməni sərhədçiləri onların hər üçünü tutaraq, yaxınlıqda olan erməni sərhəd zastavasına aparıblar. Ermənilər izahat verdikdən sonra azad buraxılıb əmim oğlu Allahverdini isə İrəvana aparıblar. O, indi Ermənistan Təhlükəsizlik Nazirliyində saxlanır”.

“Gürcü Arzusu” partiyasının Siyasi Büro üzvü  Əli Babayev baş verən hadisə barədə Gürcüstanın baş naziri Bidzina İvanişvilinin milli azlıqlarla iş üzrə köməkçisi Savalan Mirzəyevin də məlumatlı olduğunu deyib. O hadisəyə müdaxilə edəcəyini və müvafiq orqanları məlumatlandıracağını bildirib. Burma kəndində mənə hadisə ilə bağlı artıq Azərbaycan və ABŞ-ın Gürcüstandakı səfirliklərinə məlumat verildiyini bildiriblər.

Hadisə yerinə gələn Sadaxlı kənd icra nümayəndəliyinin rəhbəri Hüseyn Əsgərov açıqlamasında hadisə ilə bağlı Gürcüstan Təhlükəsizlik İdarəsi rəsmilərinin Ermənistanın əlaqədar qurumları ilə danışıqlar apardığını və bu gün Allahverdi Pələngovun geri qaytarılacağını söylədi.