Xəbər verildiyi kimi, mayın 2-də paytaxtın Nərimanov rayonu ərazisində qətlə yetirilən alman vətəndaşı Vüsal Şilderin ölümündə günahlandırılan Xəyal Əlizadə Birləşmiş Ərəb Əmirliklərində saxlanılıb və hazırda onun ölkəyə ekstradisiyası ilə bağlı məsələlər həll olunur.

Alman vətəndaşının qətlinin sifarişçisi olduğu iddia edilən X.Əlizadə ilə bağlı  maraqlı məlumatlar daxil olub. Məlumatda bildirilir ki, Prezident Administrasiyasında çalışan Tariyel Ağayevin kürəkəni olan Xəyal Əlizadə Qaradağ rayon Polis İdarəsinin ictimai təhlükəsizlik şöbəsinin rəisi olub. X.Əlizadə polkovnik-leytenantdır. Onun atası Məzahir Əliyev isə 1990-cı illərdə Bakı Şəhər Baş Polis İdarəsinin rəisi vəzifəsində çalışıb. Onun son illərə kimi Daxili İşlər Nazirliyinin Baş Narkotiklərə qarşı Mübarizə İdarəsinin rəis müavini vəzifəsini tutduğu bildirilir. Polkovnik rütbəli M.Əliyevin, həmçinin, Bakı-Sumqayıt yolundakı Neapol restoranının da sahibi olduğu qeyd edilir. 
 Qaradağ RPİ-dən Xəyal Əlizadənin həqiqətən bu idarədə şöbə rəisi olduğunu, lakin şəxsi problemləri ilə bağlı ölkəni tərk etdiyi üçün işdən azad edildiyini bildiriblər. Əldə etdiyimiz məlumata görə, Xəyal Əlizadə Qaradağ RPİ-də rəsmi olaraq şöbə rəisi vəzifəsində çalışsa da, aylarla işə gəlmirmiş. Onun ailəsi ilə birlikdə Dubayda yaşadığı bildirilir.

Xatırladaq ki, Vüsal Şilderin anası Mətanət xanım da oğlunun ölümündə X.Əlizadəni ittiham etmiş, eyni zamanda onun Dubayla olan əlaqəsinə də toxunmuşdu. Onu da bildirək ki, ailə-məişət zəminində baş verən cinayət hadisəsində indiyə qədər şübhəli şəxs qismində Şabran rayon sakini, əvvəllər iki dəfə məhkum olunmuş Elman İsgəndərov, Ağdaş rayon sakini Rüfət Zakirov, həmçinin, Abşeron rayon sakini Seymur Talıbov saxlanılıb.

Qeyd edək ki, Almaniya vətəndaşı, 1992-ci il təvəllüdlü Şilder Vüsal Adolf oğlu mayın 2-də paytaxtın Nərimanov rayonu ərazisində yaşadığı evin yaxınlığında bıçaqlanmış, xəstəxanaya aparılarkən dünyasını dəyişmişdi.

Allah rəhmət eləsin.Günahkarların tezliklə cəzalarını alacağı ümidi ilə ailəsinə səbr diləyirik.

Azərbaycanda uşaq hüquqları beynəlxalq konvensiyalar, Ailə Məcəlləsi, “Uşaq hüquqları haqqında” Qanunla və digər normativ hüquqi aktlarla qorunur.
Ailədə uşaqların malik olduğu hüquqlar barədə danışan Bakı Hüquq Mərkəzi (BHM) hüquq şirkətinin hüquq məsləhətçisi Vasif Həsənov qeyd etmişdir ki, həm beynəlxalq konvensiyalar, həm də Azərbaycan qanunvericiliyi ilə 18 yaşına (yetkinlik yaşına) çatmayan və tam fəaliyyət qabiliyyəti əldə etməyən şəxslər uşaq hesab olunurlar.
Hər bir uşaq ailədə yaşamaq və tərbiyə almaq, öz valideynlərini tanımaq və onların qayğısından istifadə etmək, uşağın maraqlarına zidd olan hallar istisna olmaqla, onlarla birgə yaşamaq hüququna malikdir. Uşaq öz valideynləri tərəfindən tərbiyə olunmaq, hərtərəfli inkişafı, onun ləyaqətinə hörmət olunması hüququna malikdir.
Valideynlərinin nikahının pozulması, valideynlərinin ayrı yaşaması uşağın hüquqlarına təsir etməməlidir. Valideynlər ayrı yaşadıqda uşaq onların hər biri ilə ünsiyyət hüququna malikdir. Ailə Məcəlləsinin tələbinə görə, hər bir uşağın valideynləri, babaları, nənələri, qardaşları, bacıları və başqa qohumları ilə ünsiyyətdə olmaq hüququ vardır. Hətta valideynlər müxtəlif dövlətlərdə yaşadıqda da uşaq öz valideynləri ilə ünsiyyətdə olmaq hüququna malikdir. Uşağın ekstremal hallarda (tutulduqda, həbs olunduqda, saxlanıldıqda, müalicə müəssisəsində yerləşdirildikdə və s.) qanunvericiliklə müəyyən olunmuş qaydada öz valideynləri və qohumları ilə ünsiyyətdə olmaq hüququ vardır.
Vəkil bildirmişdir ki, uşağın valideynləri olmadıqda, onlar valideynlik hüquqlarından məhrum olunduqda və ya uşaq valideyn himayəsini itirdiyi digər hallarda, onun ailədə tərbiyəsi müvafiq icra hakimiyyəti orqanı tərəfindən təmin edilməlidir.
Uşağın hüquqlarının və qanuni mənafelərinin müdafiəsi valideynlər (onları əvəz edən şəxslər), müvafiq icra hakimiyyəti orqanı və məhkəmə tərəfindən həyata keçirilir. Qanunvericiliyə uyğun olaraq yetkinlik yaşına çatana qədər tam fəaliyyət qabiliyyətli hesab edilən şəxslər öz hüquq və vəzifələrini, o cümlədən müdafiə hüququnu müstəqil həyata keçirirlər.
V.Həsənov bildirmişdir ki, qanunvericilik uşaqlara hüquq və mənafeləri pozulduğu halda məhkəməyə müraciət etmək hüququ verir. Uşağın hüquqları və qanuni mənafeləri pozulduqda, o cümlədən valideynləri (onlardan biri) uşağın təhsili, tərbiyəsi üzrə vəzifələrini yerinə yetirmədikdə və ya valideynlik hüquqlarından sui-istifadə etdikdə, uşaq öz hüquqlarını qorumaq üçün müvafiq icra hakimiyyəti orqanına, 14 yaşına çatdıqda isə məhkəməyə müraciət etmək hüququna malikdir.