Bir neçə gün bundan əvvəl Bakı Şəhər Təcili və Təxirəsalınmaz Tibbi Yardım Stansiyasının əməkdaşlarını döyməkdə ittiham edilən ailə şikayətçidir.

Dalga tv Oxu.Az-a istinadən məlumatına görə ailə iddia edir ki, təcili tibbi yardım həkimi xəstəyə yüksək dozada iynə vurub və bu səbəbdən xəstə dünyasını dəyişib.

Xəstənin ölümündə ittiham edilən həkim Rizvan Hacıyev ittihamları qəbul etmir. O bildirib ki, meyitin tibbi ekspertizasından sonra hər şey bəlli olacaq:

“Ailə iddia edirsə ki, xəstənin ölümündə biz günahkarıq, qoy meyit yarılsın. Hər şey ortaya çıxacaq. Mən protokol qaydasında orada heç bir səhv etməmişəm. Artıq dozada heç bir iynə vurmamışam”. 

Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyindən verilən məlumata görə, meyitin ilkin müayinələri zamanı bəlli olub ki, xəstənin ağciyəri tamamilə məhv olubmuş:

“Xəstədə çox ağır metastaz vermiş ağciyər xərçəngi olub. Ölümünə qədər onun necə nəfəs aldığı özü möcüzədir. Dalaq və digər daxili orqanlar metastaza uğramış vəziyyətdə idi. Yəni ailənin iddia etdiyi kimi, xəstənin ölümündə hansısa iynənin təsiri olmayıb. İynə sakitləşdirici iynə olub. Xəstə ölümcül vəziyyətdə imiş”.

Xatırladaq ki, aprelin 24-də “103” çağrı mərkəzinə edilən zəng əsasında Binəqədi rayon 17 saylı köməkçi yardım stansiyasına məxsus “təcili yardım” avtomobili Qaradağ rayonunun Müşfiqabad qəsəbəsindən Sulutəpəyə yollanıb. Xəstənin yaxınları stansiya əməkdaşlarının vurduğu iynədən sonra xəstənin öldüyünü iddia edərək həm həkimi, həm də sürücünü döyüblər.