Azərbaycan Respublikasının Prezidenti yanında Gənclər Fondunun dəstəyi ilə Anar Abbasov və tərəfdaş təşkilat “SAF Həyat Naminə” Gənclər İctimai Birliyi tərəfindən Gürcüstanda “Xocalını siz də tanıyın!” layihəsi həyata keçiriləcəkdir.
Layihənin rəhbəri Anar Abbasov AzərTAc-a bildirmişdir ki, məqsəd Azərbaycan xalqının Xocalı faciəsinə göz yaşları ilə deyil, qəhrəmanlıq tarixi və bir dərs kimi baxması, bu soyqırımının dünya ictimaiyyətin diqqətinə çatdırılmasına yardım etməkdir.
Vurğulanmışdır ki, Xocalı faciəsi 200 ildən çox müddətdə erməni millətçilərinin xalqımıza qarşı apardığı soyqırımı siyasətinin ən qanlı səhifəsidir. Bu gün bu dəhşətli faciəni həm Azərbaycanı gələcəkdə təmsil edəcək gənclərimiz, həm də dünya dövlətləri, xalqları arasında təbliğ etmək hər birimizin borcudur. Bu baxımdan fevralın 25-də Tbilisidə “Xocalı haqqında həqiqət” (The Truth about the Khojaly) mövzusunda keçirəcəyimiz konfransın əsas ideyasını xalqımızın tarixini, faciəli günlərini Azərbaycan gəncliyinin dərindən öyrənməsi, eyni zamanda, digər xalqların gənclərinə olduğu kimi çatdırılmasına, Xocalı faciəsi barədə daha çox insanın məlumatlandırılmasına nail olmaq və bununla da dünyada aparılan “Xocalıya ədalət” beynəlxalq kampaniyasına dəstək verməkdir.