Gürcüstan və Rumıniya Qara dənizin tranzit potensialını daha effektiv istifadə etmək üçün regional əməkdaşlığı genişləndirməlidir. Bu barədə Gürcüstanın baş naziri Georgi Kvirikaşvili və Rumıniya prezidenti Klaus Yoxanisin görüşündə bəyan edilib.

Dalga tv Xeber.ge-yə istinadla xəbər verir ki, dünən Klaus Yoxanis Gürcüstanın baş nazirini Kotroçeni iqamətgahında qəbul edib.

Gürcüstanın hökumət başçısı və Rumıniya prezidenti Gürcüstanın Aİ və NATO-ya inteqrasiya prosesini müzakirə ediblər və bu yolda əldə olunmuş nailiyyəti qeyd ediblər. Yoxanis Kvirikaşvilini Gürcüstan vətəndaşları üçün Şengen zonası ölkələrinə vizasız gedişin qüvvəyə minməsi ilə əlaqədar təbrik edib.  

Rumıniya prezidenti ümidvar olduğunu bildirib ki, viza liberalizasiyası dövlətlər arasında ticari-iqtisadi və investisiya münasibətlərinin gələcək dərinləşməsinə, həmçinin xalqlar arasında əlaqələrin möhkəmlənməsi və turizmin inkişafına kömək edəcək.

Görüşdə tərəflər həmçinin regional problemlər və Gürcüstanın işğal olunmuş ərazilərindəki vəziyyəti müzakirə ediblər.

Rumıniya prezidenti Gürcüstanın suverenliyi və ərazi bütövlüyünü dəstəklədiyini bir daha təsdiq edib.