Sentyabrın 24-də Batumidə “Argus Xəzər-Qara dəniz nəqliyyat koridoru” adlı birinci beynəlxalq forum keçiriləcək.

APA-nın Gürcüstan bürosunun məlumatına görə, Foruma ən böyük neft, nəqliyyat və loqistika şirkətlərinin nümayəndələri, neft emal edən zavodlar, həmçinin Gürcüstan, Azərbaycan, Ermənistan, Türkmənistan, İran, Türkiyə, Rumıniya, Bolqarıstan, Özbəkistan, Əfqanıstan, Qazaxıstan, Rusiya və başqa ölkələrdən olan yanacaq istehlakçıları dəvət olunub.

Məlumata görə, tədbirdə “Azərbaycanın nəqliyyat koridorunun inkişaf perspektivləri”, “Xəzərdən Qara dənizədək, Mərkəzi Asiyadan Avropayadək nəqliyyat loqistikası və tarif siyasəti”, “Neft və quru yük nəqliyyat axınlarının qiymətləndirilməsi”, “Nəqliyyat mərkəzlərindən yeni regional layihələr” mövzularında müzakirələr aparılacaq.

Ermənistan Mərkəzi Seçki Komissiyası bazar günü keçirilən parlament seçkilərinin ilkin nəticələrini açıqlayıb.

APA-nın “news.am” saytına istinadən verdiyi məlumata görə, saat 12.00-yə 2009 seçki məntəqəsinin hamısından məlumatlar daxil olub və səslər hesablanıb.

Beləliklə, Ermənistan parlamentində partiya kimi yalnız hakim Respublika Partiyası və Daşnaksutyun Partiyası təmsil olunmaq hüququ qazanıb.

Respublika Partiyası seçicilərin 49,12 faizinin,  Daşnaksutyun Partiyası  isə 6,57 faizinin səsini toplayıb. Blok qismində isə parlamentdə 27, 32 faiz səs toplamış “Tsarukyan” və 7,77 faiz səs toplamış “Yelk” ("Çıxış") blokları təmsil olunacaq.

Qeyd edək ki, parlamentdə təmsil olunmaq üçün partiyalar ən azı 5, bloklar isə 7 faiz səs qazanmalıdır. Beləliklə, əsas müxalif qüvvələr sayılan Ermənistanın ilk prezidenti Levon Ter-Petrosyanın rəhbərlik etdiyi Ermənistan Milli Konqresi və 1999-cu ildə parlamentdə atışmada öldürülən spiker Karen Dəmirçiyanın oğlu Stepan Dəmirçiyanın başçılıq etdiyi “Xalq” partiyasının birgə təmsil olunduğu blok (1,65 faiz) və sabiq müdafiə naziri olan Seyran Ohanyan, 1991-1992-ci illərdə Ermənistanın xarici işlər naziri olmuş Raffi Ovanisyan və 1998-2008-ci illərdə xarici siyasət idarəsinin rəhbəri vəzifəsini tutmuş Vardan Oskanyan başçılıq etdiyi “Ohanyan-Raffi-Oskanyan” bloku (2,7 faiz), o cümlədən Azad Demokratlar Partiyası (0,94 faiz), Ermənistan Kommunist Partiyası (0,75 faiz), Erməni Dirçəlişi Partiyası (3,71 faiz) parlamentdən kənarda qalıb.