Gürcüstanda “Şərq tərəfdaşlığı” proqramının iştirakçısı olan ölkələrin xarici işlər nazirlərinin 6-cı qeyri-rəsmi görüşü başa çatıb.

APA-nın Gürcüstan bürosunun məlumatına görə, görüşün yekunları ilə bağlı mətbuat konfransı keçirilib.

Gürcüstanın xarici işlər naziri Georgi Kvirikaşvili son illər “Şərq tərəfdaşlığı” ölkələrinin iştirakı ilə həyata keçirilən bir sıra beynəlxalq layihələrin, o cümlədən nəqliyyat, eləcə də regional təhlükəsizlik məsələlərinin müzakirə edildiyini deyib.

Avropa Qonşuluq Siyasəti və genişlənmə üzrə komissar Yohannes Han isə Gürcüstanda həyata keçirilən islahatları alqışlayıb.

Mətbuat konfransından sonra Azərbaycanın xarici işlər naziri Elmar Məmmədyarov və Aİ-nin komissarı Yohannes Han arasında görüş keçirilib. Görüş jurnalistlər üçün qapalı olub.

Gürcüstanın xarici işlər naziri Georgi Kvirikaşvili APA-ya açıqlamasında görüşdə Avropa İttifaqının bir həftə əvvəl açıqladığı “Qonşuluq üzrə yeni siyasətdə Şərq tərəfdaşlığının rolu” adlı sənədin müzakirə olunduğunu söyləyib: “Biz bu barədə plan və “Şərq tərəfdaşlığı”nın bundan sonra inkişafını müzakirə etdik. Bu, ən əsas məsələ idi. Biz həmçinin regionda baş verən situasiyanı və tərəfdaş ölkələrlə Aİ formatında əməkdaşlığı müzakirə etdik”.

Bu gün Gürcüstan paytaxtında Avropa İttifaqının "Şərq Tərəfdaşlığı" proqramının iştirakçısı olan ölkələrin səhiyyə nazirlərinin VI qeyri-rəsmi görüşü olub.

APA-nın Gürcüstan bürosunun məlumatına görə, dialoq formatında keçirilən görüşdə Azərbaycanı səhiyyə nazirinin müavini Abbas Vəlibəyovun rəhbərlik etdiyi nümayəndə heyəti təmsil edir.

Görüşü Gürcüstan səhiyyə naziri David Sergeyenko açaraq “Şərq Tərəfdaşlığı” çərçivəsində həyata keçirilən proqramın köməyi ilə bir çox problemləri öyrənməyin və təcrübə mübadiləsi aparmağın vacib olduğunu vurğulayıb.

Sonra müzakirələr Avropa Qonşuluq Siyasəti və genişlənmə üzrə komissar Yohannes Han, sağlamlıq və ərzaq təhlükəsizliyi komissarı Vytenis Andriukaitis və digər ölkələrin səhiyyə nazirlərinin iştirakı ilə dialoq formatında başlayıb.

Müzakirələr qapalı aparılıb.

Tədbirdə çıxış edən Y. Han “Şərq Tərəfdaşlığı” ölkələrinə səhiyyə sahəsində kömək etməyə hazır olduqlarını bildirib. Sağlamlıq və ərzaq təhlükəsizliyi komissarı V. Andriukaitis (Latviya) isə “Şərq Tərəfdaşlığı” ölkələri arasında səhiyyə sahəsində keçirilən islahatları müzakirə etdiklərini bildirib: "Biz səhiyyənin sabit inkişafı üçün çalışmalıyıq. Ölkələrimiz ayrılıqda işləyə bilməz. Bu istiqamətdə bir-birimizə töhfə verməliyik. Biz böhran və miqrasiya vəziyyətində də təcrübə mübadiləsi aparmalıyıq".