Tiflisdə NATO-nun qərarverici orqanı – Şimali Atlantika Şurasının və NATO-Gürcüstan Komissiyasının iclasları keçirilir.

APA-nın Gürcüstan bürosunun xəbərinə görə, NATO-Gürcüstan Komissiyasının toplantısından əvvəl çıxış edən baş katib Yens Stoltenberq Gürcüstana rəsmi səfərindən şad olduğunu bildirib. O, ölkənin müstəqilliyinin 25-ci ildönümü münasibətilə gürcü xalqını təbrik edib.

Y. Stoltenberq toplantıda Qara dəniz regionunun təhlükəsizliyi və Gürcüstana hərtərəfli dəstək paketinin həyata keçirilməsi üzrə bir sıra məsələlərin müzakirə olunacağını bildirib: “NATO-Gürcüstan Komissiyası tərəflər arasında siyasi dialoq və əməkdaşlıq üçün forum kimi 2008-ci ildə yaradılıb. Biz Qara dəniz regionunda təhlükəsizlik məsələlərini və əhatəli şəkildə işlənib hazırlanmış dəstək paketində göstərilən məsələləri müzakirə edəcəyik. Bu paket 2014-cü ildə NATO-nun Uels sammitində irəli sürülüb və bu ilin iyulunda keçirilmiş Varşava sammitində gücləndirilib. Müttəfiqlər Gürcüstana dəstəyi gücləndirmək qərarına gəliblər. Gürcüstan NATOüzvlüyünə hazırlıq üçün bütün praktik mexanizmlərə malikdir və müttəfiqlər bu yolda ona yardım göstərməyə hazırdır”.

Gürcüstanın baş naziri Giorgi Kvirikaşvili isə qeyd edib ki, NATO-ya qoşulmaq gürcü xalqının qəti iradəsidir: “Hökumət bu iradənin gerçəkləşməsi üçün hər şeyi edir. Bu görüş Varşavada keçirilən NATO sammitinin mühüm hissəsidir və Gürcüstanın müdafiə qabiliyyətinin möhkəmləndirilməsinə, ölkəmizin üzvlüyə hazırlanmasına yönəlib”.

Xatırladaq ki, Şimali Atlantika Şurası və NATO-Gürcüstan Komissiyasının iclasında iştirak etmək üçün alyansın baş katibi Yens Stoltenberqin başçılığı ilə ittifaqa üzv ölkələrin NATO qərargahındakı səfirləri Gürcüstana səfər edib. 

Bu gün Tiflis şəhərində Gürcüstanın baş naziri Giorgi Kvirikaşvili və NATO-nun baş katibi Yens Stoltenberq arasında görüş keçirilib.

APA-nın Gürcüstan bürosunun xəbərinə görə, görüşdə Gürcüstanda demokratik islahatlar, parlament seçkilərinə hazırlıq məsələləri, NATO-Gürcüstan münasibətlərinin gücləndirilməsi, əlaqələrin perspektivi əsas müzakirə mövzuları olub.

 
Baş nazir G. Kvirikaşvili NATO baş katibinin Gürcüstana səfəri münasibətilə ona minnətdarlığını bildirib. Hökumət başçısı bu səfərin Gürcüstana NATOdəstəyinin bir təsdiqi olduğunu vurğulayıb. O, oktyabrda keçiriləcək parlament seçkilərinin demokratik norma və beynəlxalq standartlar çərçivəsində gerçəkləşməsi üçün səylərini əsirgəməyəcəyini qeyd edib.

Tərəflər Gürcüstanın müdafiə qabiliyyətinin möhkəmləndirilməsi və NATO-nun bu prosesdə roluna xüsusi diqqət yetiriblər.

Görüşdə NATO baş katibinin müavini Aleksandr Verşbou, Qafqaz və Mərkəzi Asiya üzrə NATO baş katibinin xüsusi nümayəndəsi Ceyms Appaturay,NATO-nun Gürcüstan ofisinin rəhbəri Uilyam Lahue, Gürcüstanın xarici işlər naziri Mixail Janelidze, daxili işlər naziri Georgi Mqebrişvili, ədliyyə və müdafiə nazirləri, Avropa və avroatlantik məkana inteqrasiya məsələləri üzrə dövlət naziri David Bakradze, Gürcüstanın NATO-dakı daimi nümayəndəsi Aleksandr Maysuradze, hökumət administrasiyasının rəhbəri Nino Kobaxidze və başqa rəsmi şəxslər iştirak edib.

Qeyd edək ki, Tiflisdə NATO-nun qərarverici orqanı – Şimali Atlantika Şurasının və NATO-Gürcüstan Komissiyasının iclası keçiriləcək. İclasda iştirak etmək üçün alyansın baş katibi Yens Stoltenberqin başçılığı ilə ittifaqa üzv ölkələrin NATO qərargahındakı səfirləri Gürcüstana səfər edib.