Gürcüstanın hakim Gürcü Arzusu Partiyasının dəstəklədiyi prezidentliyə müstəqil namizəd Salome Zurabişvili özünün və övladlarının hədə-qorxu mesajları aldığını bildirib.

“Report”un Gürcüstan bürosu xəbər verir ki, bunu prezidentliyə namizəd keçirdiyi brifinqdə bildirib.

S.Zurabişvili son günlər ona və övladları Teymuraz və Ketevana ölüm hədələri olan qısa ismarıc və səsli mesajlar göndərildiyini deyib: “Mesajlarda “Biz başlarınızı güllələyərik, qanınızı içərik” kimi senzuradan kənar sözlərdən istifadə olunmaqla həyatımıza təhlükənin olduğu aydın şəkildə bildirilib. Təhlükə realdır, çünki mesajların müəəlifləri müəyyən olunub. Onlar Vahid Milli Hərəkat Partiyası ilə əlaqəli olan keçmiş hərbçilərdir”.

Prezidentliyə namizəd Gürcüstan Daxili İşlər Nazirliyini ona və ailə üzvlərinin ölümlə hədələnməsi faktına dərhal reaksiya verməyə çağırıb.

Gürcüstanda gənclərin təmsil olunduğu 38 təşkilat Baş nazir Mamuka Baxtadzeyə müraciət təqdim edib.

“Report”un yerli bürosunun verdiyi xəbərə görə, QHT-lər Gürcüstan hökuməti yanında Gənclərdən ibarət Məsləhət Şurasının yaradılmasını xahiş edir.

Təşkilatlar şuranın yaradılmasında fəal iştirak etməyə hazır olduqlarını bildirib.

“Gürcüstanda baş vermiş son proseslər göstərdi ki, hökumət və cəmiyyət arasında kommunikasiyada müəyyən baryerlər mövcuddur. Gənclərdən ibarət Məsləhət Şurası hökumət və gənclər arasında vasitəçi rolu oynaya bilər. Biz inanırıq ki, gənclərin hökumətin fəaliyyətinə cəlb olunması həm ölkə, həm də ölkədə yaşayan gənclər üçün müsbət nəticələr verəcək”, - müraciətdə qeyd olunub.

Müraciət müəllifləri bildiriblər ki, Gürcüstan hökuməti Gənclərdən ibarət Məsləhət Şurasının yaradılmasını dəstəkləsə, bu sahədə üçüncü ölkə olacaq. Belə ki, Kanada və Böyük Britaniya hökumətləri yanında analoji şuralar fəaliyyət göstərir.

Baş nazirə ünvanlanan müraciətə Gürcüstanda yaşayan milli azlıqların təmsil olunduğu gənclər təşkilatları da qoşulub. Sənədi həmçinin Gürcüstanın Azərbaycanlı Gənclərinin İttifaqı da imzalayıb.