Gürcüstanın energetika naziri Kaxa Kaladze ölkəsinin qaza olan tələbatının Azərbaycan tərəfindən tam ödənilə bilməyəcəyini deməklə Rusiyanın “Qazprom” şirkətindən əlavə mavi yanacaq alacaqlarını bəyan edib.
Dalga TV Gürcüstan KİV-nə istinadla xəbər verir ki, Kaladzenin açıqlaması Gürcüstanın siyasi dairələrində etirazlara səbəb olub. Ölkənin tanınmış iqtisadi ekspertlərindən biri, Gürcüstan Milli Bankının keçmiş sədri Roman Qoçiridze Kaxa Kaldzenin açıqlamasına sərt şəkildə cavab verib.

“Kaladze deyir ki, qaz çatmır. Azərbaycandan almaq mümkün olmur və ona görə “Qazprom”dan qaz almalıyıq. Belə çıxır ki, Azərbaycan 2018-ci ilə qədər ehtiyacımız olan cüzi qaz həcmi ilə bizə təmin etməyəcək. Niyə 2018? Çünki həmin ildən “Şahdəniz-2” layihəsi işə düşəcək və bizim ərazimizdən əlavə 6 milyard kub metr qaz keçəcək. 2019-cu ildən isə indiki 7 milyard yerinə, 17 milyard kub metr qaz keçəcək.

Kaladze deyir ki, Rusiya qazı baha olarsa, onu almayacağıq. Bu isə gülməlidir. Rusiyadan qaz almasaq, bəs kimdən alacağıq.

Kaladze deyir ki, əvvəlki hakimiyyət də Rusiyadan qaz alıb. Bəyəm bu arqumentdir? Alternativ olmayana qədər alırdıq. Sonra Bakı-Tbilisi-Ərzurum kəməri işə düşdü və rus qazı yerinə Azərbaycan qazının çəkisi artmağa başladı. Bu kəmər tam işə düşdükdən sonra rus qazına əl yellədik.

Nəticə olaraq deməliyəm ki, baş verənlər hakimiyyətdəkilərin şəxsi maraqlar naminə Azərbaycan, Türkiyə, Avropa və ABŞ orientasiyalı mövqedən geri çəkilməsi deməkdir”