“Biz Azərbaycan xalqına minnətdarıq”.

Ölkələrimiz arasında əlaqələr xoş niyyətli və qonşuluq münasibətlərinə əsaslanır, hansı ki, bu münasibətlər bir çox imtahanlardan keçib. Azərbaycan tərəfindən Gürcüstan iqtisadiyyatına böyük dəstək var. Bunun üçün biz Azərbaycan xalqına minnətdarıq.

"Dalğa TV"nin xəbərinə görə, bu sözləri Gürcüstan prezidenti Giorgi Marqvelaşvili Azərbaycan prezidenti İlham Əliyev ilə təkbətək və hər iki ölkənin nümayəndə heyətləri ilə görüşdən sonra keçirilən mətbuat konfransında deyib.

“Biz görüşümüzdə regionda qloballıq nöqteyi-nəzərdən çıxış etdik, sabitlik haqqında danışdıq, stabilliyin əhəmiyyətini vurğuladıq. Biz münaqişələrin sülh yolu ilə həlli yollarını və bir-birimizin suverenliyini, ərazi bütövlüyünü dəstəklədik. Mən Azərbaycanda keçən parlament seçkiləri münasibətilə cənab İlham Əliyevi təbrik edirəm. Azərbaycan prezidentinin seçkilərdən sonra ölkəmizə gəlişi böyük əhəmiyyət kəsb edir”, - Gürcüstan prezidenti çıxışında bildirib.

Onun sözlərinə görə, Gürcüstan Avropa və Asiya arasında həmişə bir dəhliz rolunu oynayıb: “Biz nəqliyyat funksiyasına vəfalı olduğumuzu göstərmişik. Bu baxımdan münasibətlərimizi dərinləşdirməyə həmişə hazırıq. Haqqında söhbət etdiyimiz layihələrin perspektivi enerji və nəqliyyat əməkdaşlığın daha da dərinləşdirilməsinə gətirib çıxaracağına əminəm”.