Türkiyə Suriya və İraqdan olan qaçqınlara yardım üçün 10 milyard dollar xərcləyib. ANS PRESS-in məlumatına görə, bunu Rəcəb Tayyib Ərdoğan İstanbulda keçirilən Birinci Humanitar sammitdə çıxış edərkən bildirib. 

"Suriyadan və İraqdan olan qaçqınlar bizdə sığınacaq tapıblar. Biz bombalardan canını qurtarmaq istəyənlər üçün qapımızı heç vaxt bağlamayacağıq. Təkcə 2014-cü ildə biz humanitar məqsədlər üçün 6,4 milyard dollar xərcləmişik və bu rəqəm ildən-ilə artır. Bizim qaçqınlar üçün 10 milyard dollar xərclədiyimiz bir vaxtda dünya birliyi bu istiqamətdə yalnız 456 milyon dollar xərcləyib", - deyə Ərdoğan sammitin açılışında bildirib.

O əlavə edib ki, cari beynəlxalq yardım sistemi  operativ həll tələb edən problemləri aradan qaldıra bilmir: "Bu köməyin ağırlığı ayrı-ayrı ölkələrin çiyinlərinə düşür, amma hər kəs bacardığını etməlidir".

Türkiyədə Birinci Dünya Humanitar Sammiti öz işinə başlayıb. ANS PRESS-in məlumatına görə, ev sahibi ölkənin rəhbəri Rəcəb Tayyib Ərdoğanzirvənin keçirildiyi İstanbul Konqres Mərkəzinə gəlib.

Sammitdə 60-a yaxın ölkə və hökumət rəsmisi iştirak edir. 

Ərdoğan zirvənin proqramına uyğun olaraq iştirakçılarla səhər yeməyində görüşüb. Toplantı mətbuata qapalı keçiriləcək. İştirakçılar ailə şəkli çəkdirəcəklər.

Sammit Ərdoğanın çıxışı ilə başlayacaq.

Bu gün Türkiyədə Birinci Dünya Humanitar Sammiti öz işinə başlayacaq. Sammit İstanbul şəhərində baş tutacaq. Sammit böhranların qarşısını almaqda hazırlığın təmin edilməsində dönüş mərhələsi olacaq, eyni zamanda böhranlara və beynəlxalq birliyin insan iztirablarına son qoyulmasına yanaşma tərzini dəyişəcək.

İlham Əliyev Türkiyəyə gedib

Sammitdə iştirak etmək üçün dünya liderləri ötən gündən başlayaraq İstanbula toplaşmağa başlayıblar. İki gün davam edəcək tərbirdə BMT-nin baş katibi Pan Gi Munla yanaşı, bir çox dünya liderinin də iştirakı nəzərdə tutulub. 

Azərbaycan Respublikasının Prezidenti İlham Əliyev və xanımı Mehriban Əliyeva Dünya Humanitar Sammitində iştirak etmək üçün mayın 22-də Türkiyə Respublikasına işgüzar səfərə gediblər. İstanbulun Atatürk Beynəlxalq hava limanında Prezident İlham Əliyevi və xanımı Mehriban Əliyevanı Türkiyənin yüksək səviyyəli dövlət və hökumət nümayəndələri qarşılayıblar.

Sammitdə “Təhsil gözləmir” Fondunun yaradılması rəsmən elan ediləcək. BMT-nin xəbərlər mərkəzinin məlumatına görə, bu tədbir döyüş əməliyyatlarının, erkən nikahların, icbari əmək və insan alverinin qurbanı olan “itirilmiş” uşaq nəslini xilas etmək üçün yeganə şansdır.

Dünya böhran həddinə çatıb. İkinci Dünya müharibəsindən bəri iztirabların bu cür miqyası görülməyib. Ona görə də Birləşmiş Millətlər Təşkilatının baş katibi Pan Gi Mun bu qurumun fəaliyyət göstərdiyi 70 il ərzində ilk dəfə humanitar məsələlər üzrə Dünya Sammitini (İstanbul, 23-24 may, 2016-cı il) çağırır.