Oktyabrın 2-də Azərbaycana pastoral səfərə gələn Roma Papası Fransiskin rəsmi qarşılanma mərasimi olub.

“Qafqazinfo”nun məlumatına görə, Azərbaycanın və Müqəddəs Taxt-Tacın bayraqlarının dalğalandığı meydanda Roma Papasının şərəfinə fəxri qarovul dəstəsi düzülüb.

Fəxri qarovul dəstəsinin rəisi Azərbaycan prezidenti İlham Əliyevə raport verib.

İlham Əliyev Roma Papası Fransiski qarşılayıb.

Fəxri qarovul dəstəsinin rəisi Roma Papası Fransiskə raport verib.

Müqəddəs Taxt-Tacın və Azərbaycanın himnləri səslənib.

Prezident İlham Əliyev və Roma Papası Fransisk fəxri qarovul dəstəsinin qarşısından keçiblər.

Roma Papası Azərbaycan əsgərlərini salamlayıb.

Azərbaycanın dövlət və hökumət nümayəndələri Roma Papası Fransiskə, Müqəddəs Taxt-Tacın nümayəndə heyətinin üzvləri isə İlham Əliyevə təqdim olunub.

Fəxri qarovul dəstəsi hərbi marşın sədaları altında Prezident İlham Əliyevin və Roma Papası Fransiskin qarşısından keçib.

Prezident İlham Əliyev və Roma Papası Fransisk rəsmi foto çəkdiriblər.

***

Bu gün rəsmi qarşılanma mərasimi başa çatdıqdan sonra Azərbaycan Prezidenti İlham Əliyevin və xanımı Mehriban Əliyevanın Roma Papası Fransisk ilə görüşü olub.

Roma Papası səmimi qarşılanmaya görə Azərbaycan Prezidenti İlham Əliyevə təşəkkürünü bildirib.

Prezident İlham Əliyev deyib: “Sizi Azərbaycanda salamlamaqdan məmnunluq duyuram. Sizin Azərbaycana səfəriniz tarixi bir səfərdir. Çox minnətdaram ki, mənim dəvətimi qəbul edib Azərbaycana səfər etmisiniz. Ümid edirəm ki, siz vətənə xoş təəssüratlarla dönəcəksiniz. Sizin bu səfəriniz Vatikan-Azərbaycan əlaqələri üçün, eyni zamanda sivilizasiyalararası dialoqu üçün çox əhəmiyyətlidir”.

Dövlət başçısı deyib ki, Azərbaycanda bütün dinlərin nümayəndələri bir ailə kimi sülh və mehriban şəraitdə yaşayırlar.

***

“Azərbaycanda bütün dini azadlıqlar təmin edilib.

Bunu Roma Papası Fransisk prezident İlham Əliyevlə görüşündə deyib.

Roma Papası bildirib ki, indiki dövrdə xüsusilə Avropa dövlətlərində mənəvi və mədəni zənginliklər çox əhəmiyyət kəsb edir: “İndiki zamanda bu, insanlar üçün vacib olan məqamlardır. Bununla biz əlaqələrimizin məhsuldarlığından danışa bilərik”.

Roma Papası Azərbaycanda ona göstərilən isti münasibətə görə təşəkkürünü bildirib.