““Ford”un sürücüsü Namiq dayı deyib-gülən biri olduğu üçün həmişə tələbələr onunla getmək istəyirdi. Nə bilərdik, başımıza belə bir hadisə gələcək”.

Bu sözləri “Dalga tv”ye martın 9-da Bakı-Sumqayıt yolunda baş vermiş qəzada yaralanan Əfsər Cəbiyev deyib. İqtisadiyyat fakültəsinin ikinci kurs tələbəsi olan Əfsər həmin günü belə xatırlayır:

“Mənim dərsim günorta başlayır. Həmin gün sərbəst işlərimi yazmaq üçün tezdən kitabxanaya gedirdim. İkinci kursam və 1 ildən çoxdur ki, həmin “Ford”un sürücüsü Namiq dayı ilə gedib gəlirəm. Namiq dayı 14 ildir ki, Bakıdan SDU-ya tələbə aparır. Hətta sürətli sürənləri də həmişə qınayırdı ki, tələbə daşıdıqları üçün ehtiyatlı olmalıdırlar.

Qısacası, ünsiyyətcil insan olduğu üçün tələbələrin hörmətini qazanmışdı, çox vaxt onunla getmək istəyirdik. “Ford” çox vaxt dolu olur, bir neçə nəfər də ayaqüstə dururdu. Həmişə 8-ə 15 dəqiqə qalmış çıxırdılar, bu dəfə isə 8 tamamda çıxdıq. Həm də əvvəlki günlərə nisbətən daha çox tələbə minmişdi. Polis rəislərinin işə çıxdığı vaxt olduğundan çox da gözə görünməmək üçün bu dəfə həmişəkindən sürətli gedirdik. Mən həmin anı xatırlamıram, ancaq bizimlə mikroavtobusda olan bir uşaq sürücünün bir anlıq maqnitofona baxdığını və ondan sonra mişar daşlarına dəydiyini deyir. Ondan sonrasını da bilirsiz”.

Əfsər Cəbiyev sabah xəstəxanadan evə buraxılacaq. Baş ağrıları hələ olsa da, sakitlik üçün müalicəsini ev şəraitində davam etdirəcək. Tələbə hazırda onunla birlikdə müalicə alan Aydan və Aytənin vəziyyətinin ağır olduğunu, Aydanın gəzə bilmədiyini deyib:

“Xəstəxana bir az səs-küylüdür. Mənə isə sakitlik lazımdır. Həm universitet heyəti, həm də həkimlər bizə qarşı çox diqqətli oldu. Ümid edirəm, bir də belə hadisə yaşanmaz”.

"Azərbaycan Hava Yolları" QSC (AZAL) Bakı-Tbilisi-Bakı marşrutu üzrə aviareyslərin sayın artırır.

"APA-Economics" xəbər verir ki, bu barədə Gürcüstanın İqtisadiyyat və Dayanıqlı İnkişaf Nazirliyinin Mülki Aviasiya Agentliyinin yaydığı məlumatda bildirilir.

Qurum bildirir ki, artıq AZAL müvafiq razılığı əldə edib.

Aviareyslər "Airbus A319" markalı təyyarə ilə yerinə yetiriləcək.

Hazırda AZAL qeyd edilən marşrut üzrə həftədə 7 dəfə uçur.

AZAL prezidentinin köməkçisi Paşa Kəsəmənski isə "APA-Economics"ə bildirib ki, martın 26 etibarən uçuşlar yay qrafikinə əsasən yerinə yetiriləcək. Beləliklə, martın son bazar günündən etibarən bu marşrut üzrə həftə ərzində yerinə yetirilən aviareyslərin sayı 8-ə çatdırılacaq. Mayın 2-dən isə reyslərin sayı 9-dək, mayın 4-dən isə 10-dək artırılacaq.

Bu gün Bakı Ağır Cinayətlər Məhkəməsində dələduzluqda təqsirləndirilən Elbrus Ağayevin cinayət işi üzrə məhkəmə prosesi başa çatıb.

APA-nın xəbərinə görə, prosesə sədrlik edən hakim Eldar Mikayılov bildirib ki, E. Ağayev ötən ilin noyabrın 18-də Bakı İstintaq Təcridxanasında ürək tutmasından vəfat edib. Buna görə təqsirləndirilən şəxsin hüquqi varisi cinayət işinə xitam verilməsi üçün məhkəməyə ərizə ilə müraciət edib.

Hakimlər Kollegiyası müşavirədən sonra hökmü elan edib. Hökmə əsasən, E. Ağayev vəfat etdiyindən, onun barəsində seçilmiş cinayət işinə xitam verilib.

Qeyd edək ki, 2015-ci ilin fevralında Sabunçu rayonu Maştağa qəsəbə sakini, 1981-ci il təvəllüdlü Camalov Həmid Məşədibaba oğlu istintaq orqanlarına müraciət edərək bildirib ki, külli miqdarda pulu mənimsənilib. Şikayətçi 2014-cü ilin 20 sentyabr tarixində İstiqlaliyyət küçəsi 26 ünvanında tanışı, Binəqədi rayon sakini Ağayev Elbrus Rəmzi oğluna işə düzəlmək üçün 13 min manat pul verdiyini deyib. E.Ağayev H.Camalova söz verib ki, onun Azərbaycan Dövlət Neft Şirkətində (SOCAR) işə düzəldəcək. Lakin sonradan məlum olub ki, H.Camalov pulu mənimsəyib və vəsaiti geri qaytarmayıb.

Goranboyda məktəblini maşın vurub.

APA-nın qərb bürosunun verdiyi məlumata görə, rayonun Xan Qərvənd kəndində orta məktəbin yaxınlığında “Niva” markalı avtomobil yolu keçən məktəbli, 2006-cı il təvəllüdlü Qasımzadə Ayxan Vüqar oğlunu vurub. Xəsarət alan uşaq dərhal xəstəxanaya yerləşdirilib. Vəziyyətinin orta-ağır olduğu bildirilir.

Faktla bağlı Goranboy rayon Polis şöbəsində araşdırma aparılır.

ABŞ-ın Gürcüstandakı səfirliyinin əməkdaşları azərbaycanlıların yığcam yaşadıqları Marneuli rayonunda olub, bölgədəki vəziyyət, insanların həyat şəraiti ilə maraqlanıblar.

Marneuli Bələdiyyəsinin başçısı Merab Topçişvili səfirliyin əməkdaşlarına ətraflı məlumat verib. Bildirib ki, bu gün rayonda 128 min 100 nəfər yaşayır. Onların 86,4 faizini azərbaycanlılar təşkil edirlər.

Azərbaycanlılar Gürcüstan dövlətinin möhkəmlənməsində, müstəqilliyinin qorunmasında, iqtisadi inkişafında mühüm rol oynayırlar. Rayon gənclərinin sosial problemlərinin həlli, onlar üçün məşğulluq və əyləncə mərkəzlərinin yaradılması istiqamətində görülən işlər də diqqət mərkəzində olub.

Merab Topçişvili azərbaycanlıların mədəniyyəti, adət-ənənələri barədə qonaqlara ətraflı məlumat verib, Novruz bayramının mahiyyətindən danışıb. Bu bayramın baharın gəlişi ilə yanaşı, insanlar arasında birlik, bərabərlik bayramı olduğu xüsusi qeyd olunub.

Səfirliyin əməkdaşları martın 21-də Marneulidə keçiriləcək Novruz şənliyinə dəvət olunublar.

Qonaqlara bayram hədiyyələri təqdim olunub.

Bakı-Qazax magistral yolunda iki nəfərin xəsarət alması ilə nəticələnən yol-nəqliyyat hadisəsi baş verib. APA-nın qərb bürosunun verdiyi məlumata görə, hadisə yolun Tovuz rayonu ərazisindən keçən hissəsində qeydə alınıb. İki avtomobilin toqquşması nəticəsində Gəncə şəhər sakini, 1955-ci il təvəllüdlü Kifayət Məmmədova və onun qızı 1992-ci il təvəllüdlü Aytən Məmmədova müxtəlif bədən xəsarətləri alaraq Tovuz Mərkəzi Rayon Xəstəxanasına yerləşdirilib. Vəziyyətlərinin normal olduğu bildirilir.

Faktla bağlı Baş Dövlət Yol Polisi İdarəsində araşdırma aparılır.