Azərbaycan Dövlət Neft Şirkəti (SOCAR) 2015-ci ilin avqust ayında 90 min 491 ton dizel yanacağı satıb. Bu 2015-ci ilin iyul ayının göstəricisindən 22 min 041 ton çoxdur.

Bundan başqa, SOCAR-ın Marketinq və İqtisadi Əməliyyatlar İdarəsi ötən ay 27 min 984 ton təyyarə yanacağı ixrac edib.

Ümumilikdə, 2015-ci ilin yanvar-avqust ayları ərzində 650 min 797 ton dizel yanacağı, 159 min 467 ton təyyarə yanacağı və 280 ton soba mazutu ixrac edilib.

SOCAR həmçinin benzin, təyyarə yanacağı, dizel yanacağı, kükürdlü yanacağın qiymətinin iyul ayı ilə müqayisədə azaldığını qeyd edib:

Belə ki, 2015-ci ilin avqust ayında dünya bazarında etilləşdirilmiş benzinin qiyməti (1 ton üçün) -538,51 dollar, təyyarə yanacağının - 457,26 dollar, dizel yanacağının - 441,75 dollar, 1% kükürdlü mazutun qiyməti 232,36 dollar təşkil edib.

“Avqust ayında dünya bazarında Brent tipli xam neftin 1 bareli 46,65 dollara,Urals nefti - 46,14 dollara, BTC FOB Ceyhan tipli xam neft isə 48,17 dollara satılıb” - deyə, şirkət qeyd edib.