Rusiya və Çin arasındakı ticarət əməliyyatlarında ABŞ dolları istifadə olunmayacaq.

ANS PRESS-in məlumatına görə, Qərb ölkələrinin sanksiyaları ilə üzləşən Rusiya ilə Cin arasında 40-a yaxın müqavilə imzalanıb. Müqavilələr enerji, ticarət və maliyyə sahələrini əhatə edir.

Rusiya və Çin hökumət başçılarının Moskvada keçirdikləri görüşün nəticəsi olaraq hər iki ölkənin mərkəzi bankları arasında 150 milyard yuan həcmində valyuta mübadiləsi əməliyyatları barədə də razılaşma əldə edilib.

Dmitri Medvedyev maliyyə vəziyyətinin çətin olduğu dünyada uğurla inkişaf etmək üçün Rusiyanın bir çox çətinliklərlə üzləşdiyini, buna baxmayaraq hər iki ölkənin iri banklarının müştərək layihələr üçün kredit xətlərinin açılması barədə razılığa gəldiyini bildirib.

Ekspertlərin fikrincə, bank sahəsində əldə olunan razılaşma ticarət və sərmayələrdə rublun və yuanın daha geniş istifadəsinə şərait yaradacaq.

Hökumət başçılarının görüşündə Rusiya qazının şərq marşrutu - “Sibirin gücü” qaz kəməri vasitəsi ilə Çinə çatdırılması sahəsində əməkdaşlıq barədə razılığa da imza atılıb.