Avropa İttifaqı (Aİ) Gürcüstana 46 milyon avroluq makro-maliyyə yardımı (MFA) üçün anlaşma memorandumu imzalayıb. Yardım 2015-ci ildə iki bərabər hissədə həyata keçiriləcək. Proqramın məqsədi Gürcüstanın büdcə balansını və mövqeyini, iqtisadi idarəetmə və sosial fəallığı, eləcə də Aİ ilə sıx iqtisadi inteqrasiyasını inkişaf etdirməkdir.

ANS PRESS-in Avropa Parlamentinin rəsmi saytına istinadla verdiyi məlumata görə, sənədi imzalayan Aİ-nin iqtisadiyyat, maliyyə, vergi qoyma və gömrük məsələləri üzrə komissarı Pyer Moskovisi deyib ki, Gürcüstan Avropa İttifaqının davamlı dəstəyinə etibar edə bilər. Biz Gürcüstanın iqtisadi islahatlar gündəliyini dəstəkləməklə yanaşı, ölkədə maliyyə gərginliyinin azalmasına kömək edirik. Gürcüstanın inkişafyönümlü islahatların icrası ilə yanaşı, makro-iqtisadi sabitliyi qorumasını və Aİ ilə yaxın iqtisadi inteqrasiyasını dəstəkləyirik.

Xatırladaq ki, makro-maliyyə yardımı (MFA) Aİ-nin qonşuluğunda büdcə balansında ciddi problem olan tərəfdaş ölkələr üçün müstəsna böhran proqramıdır. Həmçinun BVF-nin yardımlarına əlavədir. İndiki MFA proqramı 2008-ci ilin oktyabrında Rusiya ilə hərbi münaqişədən sonra Brüsseldə beynəlxalq donorlar konfrasında təklif olunan 2 yardımın ikincisidir. 2013-cü il avqustun 12-də Avropa Parlamenti və Aİ Nazirlər Şurası bunu təsdiqləyiblər. Əvvəlki 46 milyon avroluq MFA proqramı 2009-2010-cu illərdə uğurla həyata keçirilib.