Polşa prezidenti Bronislav Komorovski noyabrın 11-də “Müstəqillik marşı” zamanı Rusiya səfirliyinin binası ətrafında törədilən əməllərə görə üzr istəyib.

B. Komorovski ZET radiosunda müvafiq bəyanatla çıxış edib. O, diplomatik missiyanın yaxınlığında baş verənləri skandal adlandıraraq buna heç cür bəraət qazandırmaq mümkün olmadığını vurğulayıb.

B. Komorovski qeyd edib ki, bu qalmaqalla bağlı Polşa adından Rusiya tərəfinə rəsmi üzrxahlıq göndərmək lazımdır. Onun fikrincə, Polşanı rusofob dövlət kimi təqdim etmək istəyən çoxsaylı qüvvələr var.

Qeyd edək ki, Rusiya olaylarla bağlı Polşadan üzrxahlıq tələb etmişdi.

“Mən Dağlıq Qarabağ məsələsinin bütün azərbaycanlılar üçün necə ağrılı məsələ olduğunu bilirəm. Bilirəm ki, azərbaycanlıların demək olar, 99 faizi Dağlıq Qarabağ məsələsində vahid mövqedən çıxış edir. 20 ildən çox keçməsinə baxmayaraq, bu məsələnin həll olunmamasına görə Azərbaycan xalqının məyusluğunu başa düşürəm”.

APA-nın məlumatına görə, bunu Azərbaycan Dövlət İqtisadi Universitetin tələbələri ilə görüşdə ABŞ-ın Azərbaycandakı səfiri Riçard Morninqstar deyib.

Səfir bildirib ki, ABŞ Minsk Qrupunun həmsədr ölkəsi kimi 20 ildir bu sahədə işləyir: “Biz Minsk Qrupu ilə birgə işləyərək, bu məsələnin nizamlanmasına nail olmaq üçün əlimizdən gələni edəcəyik. Hesab edirəm ki, əsas problemlərdən biri hər iki ölkə - həm Azərbaycan, həm də Ermənistanın böyük güclərin, böyük dövlətlərin, xüsusilə ABŞ-ın daha çox səy göstərməsini gözləməsidir. Regionlara səfər edərkən, küçədə insanlar məndən soruşurlar ki, məsələ niyə həll olunmur? Əmin edirəm ki, bu asan olsaydı, biz bunu edərdik. İnanıram ki, bu məsələ yalnız o zaman həll oluna bilər ki, münaqişə tərəfləri problemin birdəfəlik həllinə qəti qərar versinlər”.

Səfir ümidvar olduğunu bildirib ki, prezidentlərin yaxın vaxtlarda baş tutacaq görüşündə hər iki ölkə başçısı bu problemi həll etmək və konkret məsələlərlə bağlı razılığa gəlmək üçün qərar qəbul edəcəklər.

ABŞ tərəfindən Dağlıq Qarabağa hər il maliyyə yardım göstərilməsi ilə bağlı suala cavabında R. Morninqstar bildirib ki, bu, Konqresin mandatına uyğun olaraq həyata keçirilir və bu yardım ancaq humanitar məqsədlidir: “Həm də burada söhbət böyük məbləğlərdən getmir”.