“Hazır streotiplərlə hər mövzuya cavab verməyə çalışan insanların çoxusu mövzunun ağırlığını dini vəzifənin icrası motivinin üzərinə salaraq Həcc ziyarəti məsələsini ya təqdir, ya da tənqid edəcəklərdi. Halbuki, burada neft sahəsində Azərbaycanda ən dəyərli alimdən biri sayılan vicdanlı və ləyaqətli ziyalı Ramiz Qurbanovun bəhanə ilə işdən çıxarılması əsas motiv idi” deyə vurğulayıb.

F.Mustafa bildirb ki, Allahı, “Quran”ı, namazı, Həcc ziyarətini ciddiyə almaq və ya almamaq düşüncə və inanc məsələsidir:”Kimisə nəyəsə inandırmaq bizim vəzifəmiz deyil. Burada söhbət yalnız və yalnız insan haqları pozuntusundan gedir. Bir alimi universitetdən uzaqlaşdırmaq qərarını yalnız həmin universitetin Elmi Şurası verə bilər. Rektor keyfi istədiyi halda elm adamını universitetdən belə asanlıqla çıxara bilməz. İl yarım öncə həmin rektor dəyərli alimimiz Rafiq Əliyevi də əmrlə işdən çıxartmışdı. Hər halda Rafiq Əliyev Həcc ziyarətinə getmək üçün müraciət etməmişdi. Auditoriyada da siyasətdən və dindən danışmamışdı”.

Millət vəkilinin bu sözləri sosial şəbəkələrədə ciddi müzakirələrə yol açıb. Müzakirələrə qoşulan Əmək Hüquqları Liqasının rəhbəri Sahib Məmmədov “Mənim rektorun hərəkətlərinə qiymət vermək fikrim yoxdur. İşçi iki həftə işə gəlməyibsə, ona Əmək Məcəlləsinin 70 ç maddəsinin tətbiqinin nəyi məntiqsizdir?” deyə F.Mustafaya sual ünvanlayıb. Müzakirənin davamında millət vəkili S.Məmmədovu “dinsiz” adlandırıb: “Sizin kimi dinsizlərlə, dini yanlış görüntülərlə tanıdan dinçilər arasında əslində mühakimə eyniliyi var. Azərbaycan bütün hallarda dünyəvi dövlət olaraq qalacaq, sadəcə dövlətlə din arasında münasibət doğru tənzimlənməlidir. Bunun optimal yollarını isə biz kitablarla, məqalələrlə göstərməyə çalışırıq”.

Sahib Məmmədov isə “Mənə dinsiz deməklə Allah qarşısında günah işlətdiz. Dözümsüzlük, yad fikirin qəbul olunmaması - bax budur bizi gözləyən təhlükə. Siz cəmiyyətin ən qabaqda gedən insanlarından biri dərhal təhqirə keçirsizsə, onda görün nadanlardan hansı təhlükə var” deyə millət vəkilinə cavab verib.