Gürcüstanın xarici işlər naziri Maya Pancikidze Kvemo-Kartli və Samsxe-Cavaxeti bölgələrində fəaliyyət göstərən gürcü, azərbaycanlı və erməni jurnalistlərlə görüş keçirib. APA-nın Gürcüstan bürosunun məlumatına görə, tədbirdə əsas mövzu Gürcüstanın Avropa Birliyi ilə assosiasiya sazişi imzalaması və avrointeqrasiya olub. M. Pancikidze bildirib ki, Gürcüstanın yolu Avropa yoludur. O, çıxışından sonra jurnalistlərin suallarını cavablandırıb.

Nazir Bakı-Tiflis-Qars dəmir yolunun tikintisində heç bir problem olmadığını, bu layihənin Gürcüstan və bölgə üçün ən prioritet layihələrdən biri olduğunu deyib: “Düşünürəm ki, dəmir yolu 2015-ci ildə təhvil veriləcək”.

M. Pancikidze Ukraynada baş verən hadisələrin Gürcüstana təhlükə törətməyəcəyini söyləyib. Onun sözlərinə görə, Gürcüstanda əhali və dövlət Avropa Birliyi ilə assosiasiya sazişinin imzalanmasını tam dəstəkləyir, bu səbəblə ölkədə Ukrayna variantının baş verməsi gözlənilmir.

Sonra Gürcüstan prezidentinin iqamətgahında prezidentin milli azlıqlar üzrə məsləhətçisi Sofiya Şamadini jurnalistləri qəbul edib. O, ümid etdiyini bildirib ki, jurnalistlərin assosiasiya sazişi və avrointeqrasiya prosesləri barədə lazımi məlumatları var və onlar regionlarda əhalini məlumatlandıracaqlar. Tədbirdə çıxış edən prezidentin xarici əlaqələr üzrə müşaviri İvane Maçavariani assosiasiya sazişinin Gürcüstan üçün vacib bir sənəd olduğunu və bu sənədin imzalanmasına çox qısa vaxt qaldığını vurğulayıb: “Gürcüstanın gələcəyi Avropa ilə bağlıdır. Biz Avropa Birliyi ilə assosiasiya sazişini imzalamağa doğru gedirik. Saziş ticarət və iqtisadiyyatın modernləşməsinə kömək edəcək, infrastruktur yaxşılaşacaq. AB ilə əməkdaşlıq və yaxınlaşmaq Gürcüstan üçün yeni mərhələdir. Sazişdən sonra Gürcüstanda regionlar inkişaf edəcək, əhali Avropa standartlarının necə olduğunu hiss edəcək və bu standartlarla yaşayacaq. Sonda Gürcüstan əraziləri işğaldan azad olacaq”.

Qeyd edək ki, görüşlər Gürcüstanda fəaliyyət göstərən “Çoxmillətli Gürcüstan” adlı qurumun təşkilatçılığı ilə keçirilib.