Gürcüstan İnformasiya Azadlığı İnstitutunun (IDFI) təşkilatçılığı ilə Tiflisdə "Gürcüstanın demokratik və iqtisadi inkişaf perspektivləri" adlı beynəlxalq forum başlayıb.

"Dalğa TV"nin xəbərinə görə, tədbiri Gürcüstanın baş naziri Giorgi Kvirikaşvili açaraq hökumətin iqtisadi siyasətinin prioritetləri barədə məlumat verib. Baş nazir çıxışında hökumətin açıq və şəffaf fəaliyyət göstərdiyini qeyd edib. O, son üç ildə Gürcüstanın qanunun aliliyi, insan hüquqları və idarəçilik sisteminin möhkəmləndirilməsi baxımından davamlı irəliləyiş əldə etdiyini bildirib.

Forumda Avropa İttifaqının Gürcüstandakı nümayəndəliyinin rəhbəri Yanoş Herman, Almaniyanın Gürcüstandakı səfiri Bettina Kadenbax, İnformasiya Azadlığı İnstitutunun (IDFI) direktoru Giorgi Kldiaşvili və başqaları çıxış ediblər. Sonra forum diskussiya şəraitində davam edib.

"Gürcüstan Avropa və avroatlantik məkana cəhd edir" adlı paneldə Cənubi Qafqazdakı münaqişələr, o cümlədən Dağlıq Qarabağ münaqişəsi barədə fikirlər səsləndirilib. Panel çərçivəsində çıxış edən Gürcüstanın xarici işlər nazir Mixail Canelidze ölkə hökumətinin "Qazprom"la əməkdaşlığı barədə açıqlama verib. O, Azərbaycanın Gürcüstanın strateji tərəfdaşı olduğunu bildirib: "Azərbaycan bizim strateji tərəfdaşımız və Gürcüstana təbii qaz verən başlıca təchizatçımızdır. Biz Azərbaycandan böyük həcmdə qaz alırıq, lakin texniki cəhətdən Azərbaycan Gürcüstanı lazım olan qədər qazla təmin edə bilmir. Məhz bu səbəbdən biz "Qazprom"la danışıqlar aparırıq. Bu danışıqlar siyasi məsələ deyil".

Forum sabah davam edəcək.