İranda edam cəzası icra edilmiş məhbus yenidən dar ağacından asılmayacaq.

APA-nın “Radiofərda”ya istinadən məlumatına görə, İran Məhkəmə Sisteminin sədri, ayətullah Sadiq Amoli Laricani bildirib ki, hazırda həyatda olan Məhəmməd adlı şəxs əfv ediləcək.

Qeyd edək ki, İranın Şimali Xorasan vilayətinin mərkəzi narkotik maddələrin qaçaqmalçılığında günahlandırılan 37 yaşlı məhbus Bocnurd şəhərinin həbsxanasında edam edilib. O, 12 dəqiqə dar ağacından asılı vəziyyətdə qalıb və həkimlər də onun ölməsini təsdiqləyiblər. Ancaq üç il əvvəl həbs edilərək ölüm cəzasına məhkum olunmuş məhbusun cəsədinin ertəsi gün dəfn olunmaq üçün ailəsinə təhvil verilməsi qərara alınıb. Bu baxımdan meyiti İran Məhkəmə Tibbi Ekspertizasının morquna göndəriblər. Lakin ertəsi gün ailəsi onun meyitini təhvil almağa gələndə nəfəs aldığını görüblər, daha sonra məhbus dövlət xəstəxanalarından birinə köçürülüb. Hazırda polis nəzarəti altında olan həmin şəxsin vəziyyətinin yaxşı olduğu bildirilir. Ailəsinin onun həyatda olmasına sevinməsinə baxmayaraq, məhbusun vəziyyətinin daha da yaxşılaşmasından sonra ölüm hökmünün təkrar icra ediləcəyi açıqlanıb. Ancaq bu addım ölkə daxilində və xaricində ciddi narazılığa səbəb olub. Hətta İran hökuməti də edam hökmünün təkrar icra edilməsinə qarşı çıxıb.