Bəzi kütləvi informasiya vasitələrinin Azərbaycan Dövlət Neft Şirkətinin (SOCAR) Bakı şəhərində inşa etdirdiyi yeni inzibati binasının tikintisi layihəsinin 1,9 mlrd. ABŞ dolları (1,5 mlrd. manat) dəyərində olması ilə bağlı yayılan xəbərlər həqiqətə uyğun deyil. Bunu SOCAR-ın mətbuat ximdətinin rəhbəri Nizaməddin Quliyev deyib. Onun sözlərinə görə, layihənin icrası ilə bağlı aparıcı xarici şirkətlərlə imzalanmış müqavilələr hər kəs üçün açıqdır: "Tikinti ilə bağlı SOCAR rəhbərliyi dəfələrlə açıqlama verib. Səsləndirilən rəqəmlər reallıqla müqayisədə 6-7 dəfə şişirdilib. İnşaat işində tanınmış şirkətlər iştirak edir və bütün nüanslar onlar vasitəsi ilə də dəqiqləşdirə bilərlər". N.Quliyev əlavə edib ki, bu tipli xəbərlər ilk dəfə deyil yayılır: "Bu, müəyyən qüvvələrin ölkədə baş verən bütün müsbət proseslər, aparılan quruculuq işlərinə və inkişafa qarayaxma vərdişlərindən irəli gəlir". Qeyd edək ki, 2010-cu ilin oktyabr ayında ölkə prezidenti İlham Əliyevin iştirakı ilə Bakının Heydər Əliyev prospektində SOCAR-ın yeni inzibati binasının təməlqoyma mərasimi keçirilib. Şirkətin müasir ofis binasının layihələndirilməsi ilə əlaqədar işlərə 2007-ci ildə başlanılıb. Nəticədə, Cənubi Koreyanın “Heerim Architects & Planners Co. Ltd.” şirkəti tərəfindən təqdim olunan “külək-alov” konsepsiyası daha cəlbedici hesab edilib. Layihələndirmə işlərinin həmin konsepsiya əsasında aparılması məqsədəuyğun sayılıb və 2007-ci ilin sentyabrında SOCAR və “Heerim Architects & Planners Co. Ltd.” şirkəti arasında müvafiq müqavilə imzalanıb.

Tikinti üzrə xidmətlərin göstərilməsi üçün 2010-cu ilin martında elan edilən açıq müsabiqədə isə 8 nüfuzlu tikinti şirkəti arasından "TEKFEN İnşaat və Təchizat" (Türkiyə) seçilib və həmin şirkətlə SOCAR arasında müqavilə imzalanıb. Binanın inşasına müəllif nəzarətini və tikintinin idarəetmə işlərini “Heerim Architects & Planners” şirkəti həyata keçirir. Layihə ilkin olaraq 235,4 mln. dollar məbləğində dəyərləndirilir. Xatırladaq ki, 200 metr hündürlüyündə olacaq ofis binasının 40 mərtəbəsi yerüstü, 2 mərtəbəsi isə yeraltı olmaqla, ümumilikdə 5 hektar sahəni əhatə edəcək. Burada 5 konfrans zalı, fitnes mərkəzi, eyni vaxtda 1243 nəfərin istifadə edə biləcəyi bir neçə yeməkxana fəaliyyət göstərəcək. Binanın yeraltı mərtəbəsində 1 045, yerüstü mərtəbəsində isə 240 avtomobili qəbul edə biləcək dayanacaqlar olacaq. Binanın ikinci mərtəbəsi fitnes mərkəzi, 3-6-cı və 18-37-ci mərtəbələri şirkətin struktur bölmələrinin ofisləri üçün nəzərdə tutulub. Binanın fasadının ümumi sahəsi 27 min kv. metr, zirzəminin sahəsi təxminən 52 min kv. metr, ofis hissəsinin sahəsi isə 40,5 min kv. metrdir. Layihənin sahəsi 100 min kvadrat metrdən artıqdır. Bina Rixter şkalasına görə 9 ballıq zəlzələyə davamlı olacaq.

Türkiyə mətbuatında Türkiyə tərəfinin Bakı-Tiflis-Qars (BTQ) dəmir yolunun öz ərazisində tikintisini dayandırması ilə bağlı yayılan xəbərlərə “Azərbaycan Dəmir Yolları” QSC-nin Mətbuat Katibliyinin rəisi Nadir Əzməmmədov aydınlıq gətirib.

ANS PRESS-ə açıqlamasında Nadir Əzməmmədov deyib ki, müqaviləyə əsasən hər bir tərəf üzərinə öhdəliklər götürüb: “Türkiyə ərazisində yaranan problem, həmçinin maliyyə çatışmazlığı da bu ölkənin daxili işidir və qonşu ölkə hazırda bu problemin həlli ilə məşğuldur”.

O həmçinin qeyd edib ki, “Azərbaycan magistral yolun Tiflis-Gürcüstan hissəsinə cavabdehdir və bu hissədə iş qrafik üzrə aparılır. Heç bir problem yoxdur. 2014-cü ilin sonunda ilk qatar işə düşəcək. 2015-ci ilin sonuna isə biz artıq Türkiyəyə çıxış əldə edəcəyik”, - deyə Nadir Əzməmmədov əlavə edib.

Xatırladaq ki, bu gün yayılan məlumatlarda Bakı-Tiflis-Qars magistral dəmir yolunun Türkiyə tərəfinin tikintisinin maliyyə çatışmamazlıqlarına görə dayandırıldığı bildirilirdi. Yolun çəkilişinə 200 milyon manat vəsait xərclənsə də, ümumi işin cəmi 39 faizi görülüb. Tikintinin başa çatdırılması üçün isə təxminən əlavə 200 milyon manatın lazım olduğu bildirilir. Halbuki ki, ilkin hesablamalar zamanı tikintinin 110 milyon manata tamamlanması gözlənilirdi. Yaranan problemin araşdırılması və aradan qaldırılması üçün Türkiyədə nəzarət qrupu yaradıldığı deyilirdi.