Azərbaycan Təhsil Nazirliyinin nümayəndələri Gürcüstana səfər ediblər.

APA-nın Gürcüstan bürosunun məlumatına görə, nazirliyin rəsmiləri Gürcüstan Təhsil Nazirliyində görüşlər keçirdikdən sonra Tiflisdəki Azərbaycan dilli orta məktəblərə baş çəkiblər.

Daha sonra nümayəndə heyəti gürcü həmkarları ilə birlikdə Marneuliyə səfər edib. Marneuli rayon Təhsil Resursları Mərkəzinin rəhbəri Ruslan Hacıyevin APA-ya məlumatına görə, hər iki nazirliyin mütəxəssisləri Marneulidəki 8 və 3 nömrəli Azərbaycan dilli orta məktəblərdə şagird və müəllim heyəti ilə görüşərək, təhsilin vəziyyəti və problemlərlə tanış olublar. Sonra təhsil rəsmiləri 1 nömrəli Azərbaycan dilli orta məktəbin müəllimləri ilə görüşüb, məktəbə kompüter hədiyyə ediblər. Azərbaycan və Gürcüstan Təhsil nazirliklərinin əməkdaşları səfər etdikləri məktəblərdə dərslərin gedişi, dərsliklərin vəziyyəti, təhsil ocaqlarının tikintisi və müəllimlərin təhsillə bağlı təklifləri ilə maraqlanıblar.

Ruslan Hacıyevin dediyinə görə, Azərbaycan Təhsil Nazirliyinin aparat rəhbərinin müavini Yaqub Piriyev, dərslik və nəşriyyat şöbəsinin müdir müavini Əsgər Quliyev Gürcüstanın təhsil və elm naziri Tamar Sanikidze ilə görüşüb, Azərbaycan təhsil nazirinin yaxın aylarda Gürcüstana səfərinin detallarını dəqiqləşdiriblər.

Görüşlərdə Gürcüstan Təhsil və Elm Nazirliyinin ictimaiyyətlə əlaqələr departamentinin rəhbəri Natia Tuskia iştirak edib.

Azərbaycan Respublikası Gənclər Təşkilatları Milli Şurası (ARGTMŞ) “Xocalıya ədalət” beynəlxalq kampaniyası çərçivəsində yeni aksiyaya başlayıb.

ARGTMŞ-dan verilən məlumata görə, aksiyanın məqsədi Xocalı soyqırımı ilə bağlı həqiqətləri dünya ictimaiyyətinə çatdırmaq və kampaniyaya dəstək verməkdir. Aksiya elektron poçt ünvanlarında istifadə olunan imzalarda “Xocalıya ədalət” kampaniyası ilə əlaqədar elektron bannerin yerləşdirilməsindən ibarətdir. Bu bannerləri yerləşdirməklə göndərilən hər bir elektron poçt “Xocalıya ədalət” kampaniyasına dəstəkdir. Aksiya çərçivəsində “Xocalıya ədalət” kampaniyası və soyqırımı qurbanlarına aid statistik göstəriciləri ehtiva edən elektron banner tədbir iştirakçılarının elektron poçt imzalarına əlavə olunacaq. Aksiya iştirakçılarının bütün ölkə daxili və beynəlxalq yazışmalarında bu elektron banner əks ediləcək.

ARGTMŞ-ın sədri Şahin Seyidzadə bildirib ki, son illərdə Heydər Əliyev Fondunun vitse–prezidenti Leyla Əliyevanın rəhbərliyi ilə aparılan “Xocalıya ədalət” kampaniyası vasitəsilə faciə barədə həqiqətlərin dünyaya çatdırılması istiqamətində mühüm nailiyyətlər əldə olunub. Tərəfimizdən “Xocalıya ədalət” kampaniyasına dəstək olaraq həyata keçirilən elektron poçt imzası aksiyası yalnız fevralın 26-sı ilə məhdudlaşmayacaq. Aksiyaya qoşulan vətəndaşlarımızın gündəlik yazışmalarında da əks olunacaq.

Aksiya barədə ətraflı məlumatı bu ünvandan əldə etmək mümkündür.