Azərbaycanın peyk operatoru “Azərkosmos” ASC və Gürcüstanda “DTH” (Direct-to-Home, birbaşa peyk yayımı) operatoru kimi fəaliyyət göstərən “Iveriasat” şirkəti arasında “Azərspace-1” peykinin tutumlarının uzunmüddətli icarəsinə və DTH platformasının peykə çıxarılmasına dair müqavilə bağlanıb.

Rabitə və Yüksək Texnologiyalar Nazirliyinin mətbuat xidmətindən “APA-Economics”ə verilən məlumata görə, sözügedən qapalı platformanın peyk üzərindən yayıma çıxarılması platformaya daxil olan kanallara Gürcüstanla yanaşı, Avropa və Yaxın Şərq ərazisində də baxmaq imkanı verəcək. “TV11”, “Global Media Group” və “Viasat” kimi populyar kanal paketlərinin daxil olduğu platforma 60-dan çox kanalı özündə birləşdirəcək.

“Iveriasat” şirkəti “DTH” xidmətlərini göstərərək Gürcüstanın SD (standard rezolyusiyalı) və HD (yüksək rezolyusiyalı) formatında olan televiziya və radio kanallarının “MPEG4” standartında kodlaşdırılmış yayımını təşkil edir. Sözügedən şirkətin bu gün Tbilisi şəhərində keçirilmiş rəsmi açılış mərasiminə qatılan “Azərkosmos” ASC-nin nümayəndə heyəti ilə “Iveriasat” şirkəti arasında gələcək əməkdaşlıq perspektivləri də müzakirə edilib.

Qeyd edək ki, Qafqazda yeganə peyk operatoru “Azərkosmos” ASC rəqəmli yayım, “VSAT” şəbəkələri və digər telekommunikasiya xidmətlərinin göstərilməsi üçün peyk tutumları təqdim edir. Ötən ilin fevral ayında orbitə buraxılmış və “Azərkosmos” tərəfindən idarə edilən “Azərspace-1” peyki 46 dərəcə Şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir.

Gürcüstan paytaxtında “Loqistika prosesləri və dəniz magistralı” layihəsinin ikinci, yekun konfransı keçirilmişdir. Konfrans iştirakçıları Asiyadan Avropaya və əks istiqamətə marşrutlar, gələcəyə baxış və digər mühüm məsələlər ətrafında müzakirələr aparmışlar.

“Şərq Tərəfdaşlığı” layihəsinin üzvü olan ölkələrin regional proqram meneceri Stefan Bil iştirakçıları salamlamış və TRACECA layihəsinin əhəmiyyətindən söhbət açmışdır. Gürcüstan iqtisadiyyat və sabit inkişaf nazirinin müavini, TRACECA-nın Gürcüstandakı milli katibi Natia Mikeladze ölkəsində həyata keçirilən tədbirləri diqqətə çatdırmışdır.
TRACECA-nın Azərbaycandakı milli katibi Akif Mustafayev AzərTAc-ın xüsusi müxbirinə müsahibəsində demişdir ki, konfransda Bakı-Tbilisi-Qars dəmir yolu layihəsi ilə bağlı ətraflı söhbət getmiş, layihənin böyük əhəmiyyətə malik olduğu bir daha vurğulanmışdır. A.Mustafayev demişdir: Konfransda 13 ölkədən nümayəndə heyəti iştirak edirdi və mən çıxışımda BTQ layihəsi ilə yanaşı, ölkəmizdə TRACECA çərçivəsində həyata keçirilən tədbirlərə geniş yer ayırdım. İştirakçılara Azərbaycanın bu qəbildən olan layihələrə böyük miqdarda investisiya yatırdığı haqqında məlumatlar çatdırıldı. Həmçinin analoqu olmayan, müasir tələblərə tam cavab verəcək Bakı Beynəlxalq Dəniz Limanının inşasının gedişi barədə informasiya da maraqla qarşılandı.
A.Mustafayev daha sonra qeyd etmişdir ki, TRACECA layihəsinə diqqətin getdikcə artdığı müşahidə olunur və Avropa ilə Asiyanı birləşdirəcək Bakı-Tbilisi-Qars dəmir yolunun bu sahədə mühüm rol oynayacağı artıq danılmaz həqiqətdir. Bir çox ölkələr öz yüklərinin tez bir zamanda mənzil başına çatdırılması baxımından bu layihəyə üstünlük verdiklərini nümayiş etdirirlər. Bu istiqamətdə gömrük-keçid məntəqələrinin fəaliyyəti ilə bağlı planlaşdırılan yeniliklər, əlaqəli fəaliyyət proqramları da artıq çoxları üçün diqqət çəkən amillərə çevrilmişdir.
TRACECA-nın Azərbaycandakı milli katibi, həmçinin vurğulamışdır ki, konfrans iştirakçılarına Azərbaycan dövlətinin başçısının ölkə iqtisadiyyatının dinamik inkişafı ilə yanaşı, beynəlxalq layihələrə sərmayə yatırımı sahəsində qarşıya qoyduğu vəzifələr, bu istiqamətdə qazanılan böyük uğurlar, BTQ dəmir yolu layihəsinin və bir sıra digər qlobal layihələrin Prezidenti İlham Əliyevin məqsədyönlü siyasətinin məhsulu kimi artıq dünyanın aparıcı ölkələrinin diqqət mərkəzində olduğu barədə də məlumatlar çatdırılmışdır.