Bu gün Binəqədi rayonu ərazisində maraqlı hadisə baş verib.

Saat 08:25 radələrində Bakı-Sumqayıt elektrik qatarı Biləcəri stansiyası yaxınlığında hərəkətdə olarkən maşınistlər 10-12 yaşlı uşağın qəfil qatarın qarşısına çıxdığını görüblər.

Lakin onlar qatarın uşağı vurmasına mane ola bilməyiblər. Bununla belə maşınistlər qatarı saxlayıblar və reys təxminən 5 dəqiqə gecikmə ilə yerinə yetirilib.

Maraqlıdır ki, qatar uşağı vurandan sonra maşınistlər düşərək ona kömək etməyə çalışıb. Bu zaman şəxsiyyəti məlum olmayan həmin oğlan qaçaraq uzaqlaşıb.

Dəmir Yolu Nəqliyyatında Polis İdarəsindən bildirilib ki, hadisədən xəbərdardırlar, lakin uşağı tapa bilməyiblər.

Mənbə: lent.az

Daşkəsən rayonunda baş verən dəhşətli qətl hadisəsinin təfərrüatı məlum olub.
Qətli törədən 1979-cu il təvəllüdlü Ələkbərov Raqif Əliş oğlu istintaqa ifadə verib. O ifadəsində bildirib ki, üç ay əvvəl həyat yoldaşını döyüb. Qadın isə polisə şikayət edib. Nəticədə R.Ələkbərov məhkəmə qərarı ilə 500 manat məbləğibdə cərimələnib.
Ələkbərov ifadəsində qeyd edib ki, həmin gündən bəri o qədər pulu necə ödüyəcəyini düşünüb və psixoloji sarsıntı keçirib. Hadisəni törətdiyi gün sərxoş olan R.Ələkbərov həyat yoldaşı, 1980-ci il təvəllüdlü Kamilə Daşdəmir qızı Məmmədova ilə mübahisə edib: "Mən Kamiləyə dedim ki, niyə belə elədin, nə üçün polisə şikayət etdin? Vəziyyətimizin yaxşı olmayan vaxtında niyə 500 manat aparım cərimə ödəyim? Həmin vaxt Kamilə mənimlə sərt danışdı. Mən də içkili idim, ağlım başımda deyildi. Başladım ona təpik və yumruqla zərbələr vurmağa. Əsəblərim sakitləşmədi, sonra onun başına çomaqla vurdum. Mən uşağı vurmamışam. Heç uşağı görməmişəm də. Sonra bildim ki, mən Kamiləni vuranda uşağ qucağında olub. Əvvəl bilmədim öldüyünü. Çarpayıda uzanmışdı. Bir də baxdım ki, nəfəsi gəlmir. Qorxdum, evdən çıxaraq qaçdım. Hadisə zamanı evdə Kamilənin əvvəlki ərindən olan uşağı da var idi".
Ana və körpəsi bu çomaqla öldürülüb
Kənd sakini, 75 yaşlı Lətafət Tağıyeva "Report"un yerli bürosuna bildirib ki, ailədə tez-tez mübahisələr olub: "Rafiq spirtli içki düşkünü idi. O, bundan əvvəlki arvadlarını da döyüb, onlara zülm edirdi. Ona görə də bundan əvvəlki arvadlarının hərəsi 1-2 il qalır, sonra baş götürüb qaçırdılar. Rafiqin isə arvad alıb boşaması adi hala çevrilmişdi. Rafiq bundan əvvəlki arvadı İnci Vəliyevanı da çomaqla döymüşdü. O vaxt qonşular arvadı vaxtında xəstəxanaya çatdırdılar. Arvad polisə şikayət etdi və Rafiqi həbs etdilər. Həbsdən çıxandan sonra isə Kamilə Məmmədova ilə evləndi. Kamilə Məmmədova boşanmış qadın idi. Onun birinci nikahından 6 yaşlı qızı var".

L.Tağıyeva əlavə edib ki, Rafiq Ələkbərovun atası Əliş Ələkbərov məktəbdə müəllim işləyib və kəndin hörmətli kişilərindən biri olub: "Hadisə gecə olub. Rafiq səhərə yaxın görüb arvadı ölüb, qaçıb. Kamilənin birinci ərindən olan uşağı səhər tezdən anasının cavab vermədiyini görərək çölə çıxaraq qışqırıb".
Kəndin digər sakini bildirib ki, Rafiq Ələkbərov məhkəmədə cərimə olunduqdan sonra özünə məxsus olan "Niva" markalı avtomobilini satmaq istəyib: "Hadisədən bir neçə gün əvvəl də ərlə-arvad arasında dava düşüb. Qadın uşaqlarnıda götürüb rayonun Dardərə kəndindəki ata evinə getmək istəyib, Rafiq qoymayıb. Rafiq adətən pul qarşılığında kənd sakinlərinin mal-qarasını otarar, bəzi vaxtlarda isə ev tikintilərində fəhləlik edərdi. Onun Göygöl rayonunun Zurnabad kəndində əmisi oğlanları yaşayır. Rafiq də səhər tezdən çıxıb ora qaçanda meşəlikdə tutublar onu".
Daşkəsən Rayon Prokurorluğundan "Report" un yerli bürosuna verilən məlumata görə, faktla bağlı Cinayət Məcəlləsinin 120.2.7 (iki və daha çox şəxsi öldürmə) maddəsi ilə cinayət işi başlanılıb, araşdırmalar davam etdirilir. (report)

Azərbaycan vətəndaşı Əmir A. qanunsuz şəkilə sərhədi keçməyə çalışarkən Gürcüstan sərhəd polisinin əməkdaşları tərəfindən saxlanılıb.

"Report" "Qruziya-Online" portalına istinadən xəbər verir ki, istintaq təqsirləndirilən şəxsin sərhəd-keçid məntəqəsindən yayınmaqla Gürcüstan istiqamətində Azərbaycanın dövlət sərhədini qanunsuz keçdiyini müəyyən edib.

Fakt üzrə araşdırma aparılır.

Əlində qumbara partlayan Yevlax sakini ölüb.
Yevlax rayon Prokurorluğundan verilən məlumata görə, iyunun 21-də Yevlax rayon sakini, 1993-cü il təvəllüdlü Mustafayev Tural Süləddin oğlunun rayon ərazisində istifadəsiz tikilidə ilkin ehtimala görə əl qumbarasının partlaması nəticəsində ölməsi faktına görə rayon Prokurorluğunda Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə cinayət işi başlanıb.
Hadisənin baş vermə səbəblərinin müəyyənləşdirilməsi istiqamətində zəruri istintaq-əməliyyat tədbirləri davam etdirilir.

Bu gecə Səbaildə ər-arvadın qaz partlayışı zamanı xəsarət alması ilə bağlı bəzi təfərrüatlar məlum olub.

"Azəriqaz" QSC-nin mətbuat xidmətinin rəhbəri İbrahim Kərbəlayev Lent.az-a açıqlamasında bildirib ki, hadisə blokda deyil, mənzilin dəhlizində olub.

İ. Kərbəlayevin sözlərinə görə, dəhlizdən keçən qaz borusunda sızma olub və evin sakinləri də ehtiyatsız davranıblar: "Dəhlizdən qaz iyi gəldiyini hiss edib, nə olduğunu aydınlaşdırmaq istəyiblər. Alışqandan istifadə ediblər. Bu zaman partlayış yox, sadəcə yanğın qeydə alınıb. Həmin an evin qapısı da açıq olub. Hadisə zamanı evə elə də ciddi ziyan dəyməyib. Hazırda faktla bağlı hüquq-mühafizə orqanları tərəfindən araşdırma aparılır".

Qurum rəsmisi deyib ki, əhali arasında geniş miqyaslı maarifləndirmə işləri aparılmasına baxmayaraq belə xoşagəlməz hallar çox olur: "Əhaliyə bildirəm istəyirəm ki, təbii qazdan istifadə zamanı texniki tələblərə və təhlükəsizlik qaydalarına ciddi əməl etmək, ehtiyatlı davranmaq lazımdır. Əks halda hər hansı bir ehtiyatsızlıq bədbəxt sonluqla nəticələnə bilər. Qazdan istifadə anlayışı olmayanların və azyaşlıların təbii qazdan istifadəsinə icazə vermək olmaz. Evdə qazın və ya qaz borusunun yerini dəyişdirərkən mütəxəssis köməyinə müraciət etmək lazımdır. Qaz borusunun yerini özbaşına dəyişmək olmaz. Qaz boruları əlçatan və gözlə görünən yerlərdə olmalıdır ki, zamanında texniki qulluq göstərilsin".

Qusarda 5 yaşlı qızın anası tərəfindən zəhərlənərək öldürülməsi hadisəsi ilə bağlı bəzi məqamlar üzə çıxıb.

Əldə etdiyi məlumata görə, Hil kəndində yerləşən fermada yaşayan Gülnarə Saypullayeva qızı, 2012-ci il təvəllüdlü Saypullayeva Luizanı zəhərləyəndən sonra peşman olubmuş. Belə ki, bir neçə gün əvvəl 5 yaşlı Luiza səhər saatlarında yuxudan qalxandan sonra anası ona yemək verib. Bu zaman qadın uşağa verdiyi südün içinə ziyanvericilərə qarşı istifadə edilən kimyəvi məhlul qarışdırıb. Az sonra uşağın halı pisləşib. Bunu görən Gülnarə ferma sahibinin yanına qaçaraq kömək istəyib və onun maşını ilə uşağı Qusar xəstəxanasına çatdırmağa çalışıblar. Lakin artıq gec olub, 5 yaşlı qız yolda keçinib. Xəstəxanadakı müayinədən sonra uşağın öldüyü dəqiqləşib və bu barədə hüquq-mühafizə orqanlarına məlumat verilib. Müəyyən şübhələr olduğundan uşağın qanından və digər toxumalardan nümunələr götürülərək ekspertizaya təqdim edilib. Ekspertizanın nəticəsi azyaşlının zəhərlənməsini üzə çıxarıb.

Dünən Luizanın anası Gülnarə Saypullayeva izahat verməsi üçün çağırılıb və bu zaman o, törətdiyi cinayəti etiraf edib. Lakin qadın yeganə övladını niyə öldürməsinə məntiqi izah tapa bilməyib: "Birdən eynimə düşdü, qəfil qərara gəldim ki, uşağı zəhərləyim".

Qadının psixoloji vəziyyətini qiymətləndirmək üçün müvafiq ekspertiza təyin edilib.

Faktla bağlı cinayət işi açılıb, araşdırmalar davam etdirilir.

Mənbə: lent.az