Mərkəzi Bankın son qərarından sonra.

Bu gün onsuz da qiymətlər aşağı düşür. Azərbaycanda üzən məzənnə siyasətinin tətbiq olunması isə mənzil bazarında qısa müddətdə də olsa qiymətlərin stabilləşməsinə səbəb olacaq, amma gələn ilin mart-aprel aylarından isə qiymətlərin düşməsi qaçılmaz olacaq.

"Dalğa TV" xəbər verir ki , Oxu.Az-a bu barədə Daşınmaz Əmlak bazarı üzrə mütəxəssis Nüsrət İbrahimov Azərbaycanda üzən məzənnə siyasətinə keçidin mənzil bazarına təsirindən danışarkən qeyd edib.

N.İbrahimov deyib ki, qiymətlər stabil qalsa da belə, mövcud aktivlik aşağı düşəcək:

"İnsanların gəlirlərində elə bir artım yoxdur, eləcə də bazarda pul kütləsinin artımı da baş vermir. Ona görə də bazarda qiymətlər qalxacaq desək, bu, yanlış olacaq. Ona görə də qiymətlər stabil qalacaq. Amma mövcud aktivlik daha da aşağı düşəcək".

Bazarda bundan sonra tələb və təklif necə formalaşacaq sualına isə mütəxəssis bu cür aydınlıq gətirib:

"Bu gün əmlakını satmaq istəyənlər onu satışdan geri çəkirlər. Alanlar isə gözləmək mövqeyinə keçirlər, çünki onlar bilmir ki, sabah nə baş verəcək? Yəni belə deyək, hadisələrin axarını gözləyirlər", - deyə İbrahimov əlavə edib.

"Bu gün isə hələ ki qeyri-müəyyənlikdir. Ona görə də hələ ki nə satan, nə də alan var. Qərar qəbul etmirlər, gözləyirlər", - deyə o əlavə edib.

Ekspert bir daha vurğulayıb ki, ötən təcrübədə qiymətləri bahalaşdırsalar da, mənzilləri alan olmadığından qiymətləri əvvəlki yerinə qaytardılar:

"Cari ilin fevralında qiymətləri bahalaşdırdılar. Amma alan olmadı. Martda isə qiymətləri əvvəlki yerinə qaytardılar. Azərbaycanda üzən məzənnə siyasətinə keçiddən sonra bahalaşma olmayacaq. Mümkün deyil. Çünki biz artıq ötən devalvasiyada bu mərhələni keçmişik. Bu sahədə artıq təcrübəmiz var".

"Toyota" satışları dayandırdı.

Bu gün manatın yenidən ucuzlaşması avtomobil bazarına da təsirsiz ötüşməyib.

"Dalğa TV" xəbər verir ki, Fins.az-ın məlumatına görə, bəzi avtomobil şirkətləri qiymətləri bahalaşdırsa da, bəziləri qeyri-müəyyən vəziyyəti nəzərə alıb satışları dayandırıb.

Bəzi avtomobil şirkətləri isə hələlik köhnə qiymətlərlə satışları davam etdirir.

"X5" avtomobili 46 min manat bahalaşıb

"BMW", "Mini" və "Rolls Roys" avtomobillərinin satışı həyata keçirən "İmprotex Motors" şirkəti hazırda avtomobil satışının olduğu bildirilib. Avtomobilin avro ilə qiyməti artmasa da, manat məzənnəsində yeni qiymətlə satılır.

Məsələn, 87 min avroya satılan (100 min manat) 3.0 mühərrikli 2015-ci model "BMW X5"in manatla qiyməti 46 min artaraq 146 min manat olub. "BMW 520" avtomobilinin qiyməti 57 min manatdan 84 min manata qədər artıb. Şirkətdən fins.az-a verilən məlumata görə, avtomobillərin qiyməti manatın ucuzlaşma faizi həcmində (47.6 %) bahalaşıb.

"Toyota" satışları dayandırdı

"Toyota Bakı Mərkəzi" isə hazırda satışları dayandırıb. Şirkətdən fins.az-a verilən məlumata görə, manatın ucuzlaşması ilə bağlı yaranan qeyri-müyyən bir vəziyyətlə əlaqədar olaraq satışlar dayandırılıb.

Bəzi şirkətlər qiyməti dəyişməyib

"Auto Azerbaijan" şirkətinin də satışları dayandırmadığı deyilsə də, şirkət bu məlumatı təkzib edib. Bildirilib ki, hazırda bütün modellər köhnə qiymətləri ilə satılır.

"Audi Bakı Mərkəzi"ndən də avtomobillərinin qiymətlərində hər hansı bir dəyişiklik olmadığını deyiblər: "Audi"ləri köhnə qiymətlə satılır. Lakin yeni gətiriləcək avtomobillərin qiymətlərində mütləq bahalaşma olacaq".

"Honda" indiki qiymətləri 10 gün dəyişməyəcək

"Honda Avtomobil Mərkəzi"nin marketinq meneneceri Kamran Məmmədov fins.az-a bildirib ki, "Honda", "Mitsubishi", "Mazda" və "Subaru" avtomobillərinin qiymətlərində hər hansı bir artım yoxdur. O bildirib ki, dekabr ayının 31-nə kimi avtomobillər köhnə qiymətlərlə satılacaq. Yeni ildə avtomobillərin qiymətlərinin necə dəyişəcəyi hələlik məlum deyil.

Cinayət işi başlanılıb.

1 saylı Bakı İstintaq Təcridxanasında intihar edən Milli Təhlükəsizlik Nazirliyinin (MTN) Antiterror Mərkəzinin sabiq rəis müavini, polkovnik İlqar Əliyevin meyiti ailəsinə təhvil verilib.

"Dalğa TV" xəbər verir ki, bu barədə "Report"a İ.Əliyevin vəkili Rəşad Mirmehdizadə bildirib.

O, İ.Əliyevin bu gün dəfn ediləcəyini bildirib.

Qeyd edək ki, Penitensiar Xidmətin yaydığı məlumata görə, dekabrın 20-də saat 15:55 radələrində Cinayət Məcəlləsinin 302.2; 308.2 və 309.1-ci maddələri ilə təqsirləndirilən və barəsində həbs qətimkan tədbiri seçilmiş, Bakı İstintaq Təcridxanasının ikinəfərlik kamerasında saxlanılan Əliyev İlqar Mustafa oğlu intihar edib.

Məlumata görə, kamera yoldaşı telefon danışığı hüququndan istifadə etmək üçün kameranı tərk etdiyi qısa müddət ərzində orada tək qalmış İ.Əliyev mələfəni ip formasına salaraq və pəncərədəki dəmir barmaqlığa bağlayaraq özünü asıb.

Kamera yoldaşı qayıtdıqdan sonra hadisə ilə bağlı dərhal müəssisənin əməkdaşlarına məlumat verib və tibb heyətinin iştirakı ilə təxirəsalınmadan İ.Əliyevin həyatının xilas edilməsinə yönələn tədbirlər görülməsinə baxmayaraq, həmin anda ölüm halı artıq baş verdiyindən ona göstərilən tibbi yardım nəticəsiz qalıb.

Hadisə barədə dərhal aidiyyəti istintaq orqanlarına, İ.Əliyevin qohumlarına və müdafiəçisinə məlumat verilib. Hadisə yeri Bakı şəhər prokurorluğunun əməkdaşları tərəfindən məhkəmə-tibb ekspertinin iştirakı ilə müayinə edilib.

Fakt üzrə Cinayət Məcəlləsinin 125-ci maddəsi ilə cinayət işi başlanılıb və istintaq aparılır.

FHN məlumat yaydı.

Fövqəladə Hallar Nazirliyi (FHN) "Günəşli" neft yatağında yerləşən 10 saylı dərin dəniz özülündə dekabrın 4-də baş vermiş qəza nəticəsində yaranan yanğının söndürülməsi istiqamətində gördüyü işlərlə bağlı videogörüntü yayıb.

Nazirlikdən bildirilib ki, özüldə yanan qaz quyularının yaxın zamanda söndürülməsi təmin ediləcək.

Qeyd edək ki, dekabr 10-dan etibarən özüldə yanğınsöndürmə əməliyyatını həyata keçirən nazirliyin "Vixr-5" və "Vixr-8" gəmilərindən hər gün tərkibinə təcrübəli yanğınsöndürənlərin daxil olduğu 2 manqa xüsusi yanğınsöndürmə avadanlığı və mühafizə vasitələri ilə özülə desant edilir.

Özülə desant edilən qruplar yanan quyular ətrafında SOCAR tərəfindən qəza-bərpa işlərini aparan işçilərin təhlükəsizliyini, təhlükə zamanı onların mühafizəsini təmin etməklə yanaşı, eyni zamanda, yanğının söndürülməsi işlərini həyata keçirirlər.

Yanğınsöndürənlərin gərgin səyləri nəticəsində dekabrın 15-də neft quyularının birində yanğını söndürmək mümkün olub.

Yanğınsöndürmə əməliyyatının fasiləsiz və yüksək peşəkarlıqla həyata keçirilməsini təmin etmək məqsədilə dekabr 15-dən nazirliyin Dövlət Yanğından Mühafizə Xidmətinin təcrübəli yanğınsöndürənlərindən təşkil edilmiş 11 nəfərdən ibarət qrup 10-cu özülə desant edilib. Bu gün saat 13:00 radələrində ikinci neft quyusunda da yanğın söndürülüb.

Gürcüstanın Marneuli rayonunun azərbaycanlıların kompakt yaşadığı Təzəkənd kəndinin sakinləri etiraz aksiyası keçiriblər.

"Dalğa TV"nin məlumatına görə, sakinlər qonşu Alget kəndindən Qırmızı Körpü magistral yoluna qədər uzanan 10 kilometrlik kənd yolunun asfaltlaşdırılmasının gecikməsindən və kəndə verilən içməli suyun vaxtında əhaliyə çatdırılmamasından şikayətləniblər.

Marneuli rayon bələdiyyəsinin sədri Nəbi Abdullayev açıqlamasında Təzəkənd sakinlərinin tələbi ilə tanış olduqlarını, hətta sakinlərlə bir dəfə mövzu ilə əlaqədar görüşdüyünü bildirib: "Təzəkəndin yolu doğrudan da bərbad vəziyyətdədir. Kənd sakinlərinin tələbi düzgündür. Alget kəndindən Tiflis-Qırmızı Körpü magistral yolunadək 10 kilometr məsafəyə asfalt yol çəkilməlidir. Həmin yolun hələlik 3 kilometrini çəkmək istəyən şirkət tenderdə qalib gəlib, lakin bu şirkətin dövlətə borcu olduğuna görə tenderdən kənarlaşdırılıb. Sonra dövlət həmin 3 kilometr yolun tikintisini başqa şirkətə həvalə edib. Tenderin qalibi olan birinci şirkət isə məhkəməyə şikayət edib. Yolu düzəltmək istəyən şirkət mübahisəli məsələnin həllini gözləyir. Sonda hansı şirkətin asfalt çəkəcəyinə məhkəmə qərar verəcək. Digər 3 kilometr yolu Dünya Bankı maliyyələşdirəcək, son 4 kilometrə isə başqa bir şirkət cavabdehdir".

Təzəkəndin də daxil olduğu Alget ərazi icra nümayəndəliyinin mütəxəssisi Vaqif Ocaqverdiyev də problemin yaxın vaxtlarda həll olunacağını bildirib: "İçməli su probleminə gəlincə, əhalini içməli su ilə təmin edən "Rustavi Su" şirkəti sakinlərə fasilələrlə su verir. Əhali həmişə bu məsələni qaldırır. "Rustavi Su" şirkəti vaxtlı-vaxtında su xəttini təmir edə bilmir və nəticədə kəndlər içməli su ilə təmin olunmur. Məsələni həll etmək üçün rayon icra hakimiyyəti su xəttini öz balansına götürməlidir ki, əhali içməli su ilə təmin olunsun".

Bakıda yeni oğurluq növü işə salınıb.

"Dalğa TV" criminal.az-a istinadən məlumat verir ki, "orta yaşlı bir kişi oğurluq etmək üçün ağlagəlməz üsuldan istifadə edir. Kadrlarda görəcəyiniz "qəhrəman" binaların bloklarına daxil olduqdan sonra elektrik təchizat qutusunda "gözaltı" etdiyi avtomatı söküb aparmaq üçün əvvəlcə qısaqapanma yaradır. O, bu yolla evdə adam olub-olmadığın müəyyənləşdirir.

Daha sonra avtomata gələn və gedən ana xətti zəif kabellə birləşdirərək avtomatı rahatlqla sökür. O, oğurladığı avtomatla birlikdə getdikdən bir neçə dəqiqə sonra isə zəif naqil qızaraq sıradan çıxır.

'Bu kadrları hüquq-muhafizə orqanlarına təqdim edərək bu alçağın yaxalanması üçün çalışacağam. Görüntülərdəki "qəhrəman"ı tanıyanlardan xahiş edirəm bu barədə məlumat yazsınlar'deyə şikayətçi vurğulayıb.

Kadrlarda gördüyünüz hadisə dekabrın 12-də saat 13 radələrində Azadlıq Prospekti metrostansiyasının yaxınlığında, S.S.Axundov 1b ünvanında baş verib.

"