3 gün davam edən simpozium şəhərin mərkəzindəki "Altıs Grand" hotelində baş tutub . Konfransdan bir gün əvvəl tədbir təşkilatçıları və Avropanın bir çox ölkələrindən qatılan müəllim heyəti ilə tələbələr arasında görüş keçirilib. Görüşdə tədbirin əsas mövzusu olan " Dərmanlar haqqında düzgün məlumat - daha yaxşı qərar verməyə kömək edir" müzakirə olunub.

Tədbiri Avropanın Klinik Əczaçılıq cəmiyyətinin prezidenti İsveçrəli professor Markus Lampert açıb. Daha sonra Simpoziumun prezidenti professor Fernando Fernandez qonaqları salamlayıb.Tədbirdə çıxış edənlər "Avropada Klinik Əczaçılığın tibbdə rolu" və günümüzdə aktual olan bir çox tibb sahəsini əhatə edən mövzulardan bəhs ediblər.

3 gün davam edən tədbirdə bir çox Avropa ölkələrindən qatılan tələbə və müəllimlər Kliniki Əczaçılıq sahəsində yazdıqları məqalələrini təqdim ediblər. İştirakçılar arasında Azərbaycan Dövlət Tibb Universitetini bitirmiş , daha sonra Türkiyənin ən nüfuzlu universitetlərindən biri olan İstanbul Marmara Universitetində təhsilini davam etdirmiş azərbaycanlı tələbə Samirə Şahismayıl qızı Məmmədova da öz məqaləsi ilə çıxış edib. Tələbənin mövzusu "Xroniki ağciyər xəstələrinin evdə və xəstəxanada istifadə etdikləri dərmanların qarşılaşdırılması və bundan yarana biləcək problemlərin həlli yolları"nı əhatə edib. Fəal iştirakına görə seçilmiş tələbələr arasında olan həmyerlimizə sonda sertifikat təqdim olunub.

Qeyd edək ki, növbəti 45ci "Avropada Klinik Əczaçılıq" simpoziumunun Norveçin Oslo şəhərində keçirilməsi nəzərdə tutulur.

Ekologiya və Təbii Sərvətlər Nazirliyi əhaliyə xəbərdarlıq edib.

Nazirliyin Milli Hidrometeorologiya Departamentindən verilən məlumata görə, noyabrın 7-si axşamdan 11-i gündüzədək ölkə ərazisində hava şəraitinin qeyri-sabit keçəcəyi, arabir yağış yağacağı, bəzi yerlərdə intensiv olacağı, dağlıq rayonlarda sulu qara, qara keçəcəyi gözlənilir.

Havanın temperaturu ötən günlərlə müqayisədə tədricən 4-6 dərəcə aşağı enəcək. Çaylarda sululuğun artacağı ehtimal olunur.

Dünya Xərçəng Araşdırmaları Fondunun alimləri xərçəng xəstəliklərinin riskini azaltmaq üçün bunları tövsiyə edirlər:

1. Artıq çəki yığmayın. Artıq çəki 10 xərçəng növünün risk faktoru sayılır, xüsusilə bu qara ciyər, prostat vəzi, bağırsaqlar, qadınlarda süd vəziləri xərçənginə aiddir.

2. Hərəkət edin. Fiziki aktivlik qan dövranı, həzm prosesləri, immuniteti yaxşılaşdırır ki, bu da bir çox xərçəng xəstəliklərinin qarşısının alınmasına kömək edir.

3. Tez-tez meyvə-tərəvəz, göyərti yeyin. Bu məhsullar antioksidant maddələrlə zəngindir. Antioksidantlar orqanizmi hüceyrə səviyyəsində qoruyur. Qidalı liflərlə zəngin olan meyvə-tərəvəzlər qəbizliklərin qarşısını alır. Xroniki qəbizlik isə bağırsaq xərçənginin əsas risk faktorlarından bri sayılır.

4. Spirtli içkilərin qəbulunu azaldın. Ekspertlərin fikirinə görə, spirtli içkilərin çoxlu miqdarda qəbulu qida borusu, qara ciyər, bağırsaqlar, qadınlarda süd vəziləri xərçənginin əsas risk faktorlarından biri sayılır.

5. Şirin qazlı içkiləri və fast-fud qidaları qəbul etməyin. Bu qidalar piylənməyə səbəb olur. Piylənmə isə xərçəng xəstəliklərinin əsas səbəblərindən biridir.

6. Duzun qəbulunu məhdudlaşdırın. Duzun həddən artıq miqdarda qəbulu mədə xərçənginin riskini artırır.

7. Kolbasa, sosis kimi məhsulları qidalanmadan çıxardın. Alimlərin fikirinə görə, bu məhsulların daim qəbulu mədə-bağırsaq sistemi xərçənginin inkişafına təkan verə bilər.

Qırmızı ətin (mal, qoyun əti) qəbulunu isə 1 həftə ərzində 500 qr kimi azaltmaq tövsiyə edilir.

8. Vitaminlərin qəbulunu azaldın. Bəzi vitaminlərin (həb şəklində) həddən artıq miqdarda qəbulu xərçəng xəstəliklərinin inkişafına təkan verə bilər. Bu səbəbdən həkimlər vitaminləri həblərdən deyil, təbii məhsullardan almaq tövsiyə edirlər.

9. Qadınlara məsləhət – əmizdirin. Alimlərin fikirinə görə, 6 ay və bundan artıq müddət ərzində əmizdirmə qadınlarda süd vəzi xərçənginin riskini azaldır.

10. Siqaret çəkməkdən imtina edin. Ağ ciyər xərçənginin səbəbi 90% hallarda siqaret çəkmək olur. Bundan əlavə bu pis vərdiş boğaz, qırtlaq, qida borusu xərçənginin inkişafına təkan verə bilər.

Prezident Azərbaycan icması ilə görüşdü.

Azərbaycan Prezidenti İlham Əliyev və Gürcüstan Prezidenti Giorgi Marqvelaşvili noyabrın 6-da Marneuli rayonunda "Çay evi" tədris mərkəzi ilə tanış olublar.

"Dalğa TV"nin verdiyi xəbərə görə, dövlət başçılarına məlumat verilib ki, 2012-ci ildə Azərbaycan Respublikası Dövlət Neft Şirkətinin Gürcüstan nümayəndəliyinin dəstəyi ilə Marneuli rayonunda istifadəyə verilən "Çay evi" tədris mərkəzinin binası müasir memarlıq üslubunda inşa olunub.

Tədris mərkəzində il ərzində Marneuli, Bolnisi, Dmanisi və Qardabani rayonlarından olan gənclərə gürcü, ingilis və fransız dilləri pulsuz tədris edilir. Burada, həmçinin şahmat kursları, rəqs dərnəyi və xalçaçılıq kimi qədim milli sənətimizin sirləri öyrədilir.

Qeyd edilib ki, layihə Azərbaycan Respublikası Dövlət Neft Şirkətinin Gürcüstan nümayəndəliyi və Marneuli Gənclər Mərkəzi arasında bağlanmış memoranduma əsasən həyata keçirilib. Üç mərtəbədən ibarət olan mərkəzin ümumi sahəsi 1300 kvadratmetrə yaxındır. Burada Azərbaycan mətbəxinin təbliğinə də mühüm önəm verilir. Mərkəzdəki "Muğam" restoranında milli mətbəximizin təamları təqdim edilir.

Bildirilib ki, "Çay evi" memarlıq layihəsi 2013-cü ildə Londonda keçirilən və Avropanın nüfuzlu beynəlxalq qurumu olan "European Property Awards"ın təsis etdiyi "Sosial memarlıq" nominasiyasında qalib gələrək birinci yerə layiq görülüb.

"Çay evi" tədris mərkəzi ilə tanışlıqdan sonra Prezident İlham Əliyev və Prezident Giorgi Marqvelaşvili Gürcüstanda yaşayan Azərbaycan icmasının nümayəndələri ilə görüşüblər.

Dövlət başçıları görüşdə çıxış ediblər.

Sonra Gürcüstan parlamentinin deputatı Mahir Dərziyev, Marneulidə fəaliyyət göstərən Azərbaycan Mədəniyyət Mərkəzinin sədri Fazil Həsənov, iş adamı İspəndiyar Məmmədov və sahibkar Heydər Musayev çıxış ediblər.

Sabiq milli təhlükəsizlik naziri Eldar Mahmudovun daha bir yaxın adamı həbs olunub.

"Dalğa TV" xəbər verir ki, "Ağdamlı Dəmir" kimi tanınan məşhur avtomobil alverçisi ötən həftə saxlanılıb. Bakının bir neçə mərkəzi yerlərində böyük avtomobil salonları (eləcə də Badamdardakı 3 mərtəbəli "Avtomobil dunyası"nın sahibidir red.) olan "Dəmir" nazir Eldar Mahmudovun şəriki olub. Məlumata görə, o, ölkədə ən bahalı avtomobillərin satışıyla məşğul imiş.

Onun həbsinə səbəb isə MTN-in iş adamlarına divan tutması prosesində, daha doğrusu, iş adamlarının şikayətlərində adı keçən əsas şəxslərdən biri olmasıdır. Araşdırma zamanı məlum olub ki, MTN-in toruna düşən adamların avtomobillərini məhz "Dəmir" "əridirmiş". Belə ki, bəzi iş adamları onlardan tələb olunan məbləğləri düzəldə bilməyəndə özlərinin bahalı avtomobillərini təhvil verməyə məcbur olublar. Belə hal olduqda həmin şəxslər "Dəmirə" yönləndirilib. Bundan başqa həm də "Dəmir" bahalı avtomobil alanlar, yəni növbəti hədəf ola biləcək şəxslər barədə MTN-ə məlumatlar ötürürmüş.

Qeyd olunur ki, "Dəmirin" nazirləçox yaxın münasibətləri olub. Elə bu münasibətlərə görə də, nazir onun oğlunun birinə MTN-də məsul vəzifə hədiyyə edib.

Ermənistanda saxlanılan Gürcüstan vətəndaşı, milliyətcə azərbaycanlı Turqay Mikayılovun işi üzrə məhkəmə prosesi noyabrın 26-a təyin edilib.

"Dalğa TV"nin "news.am"a istinadən verdiyi məlumata görə, bu barədə Lori rayonu məhkəməsindən bildiriblər. Məlumata görə, daha əvvəl noyabrın 2-də təyin olunan prosesin vaxtının dəyişdirilməsinə qərar verilib.

İddiaya əsasən, Faxralı kənd sakini, 35 yaşlı T. Mikayılov 2015-ci il iyunun 23-də Lori rayonunun Dzyunaşox kəndi istiqamətində Gürcüstan-Ermənistan sərhədini qanunsuz keçib. Fakt üzrə "sərhədi qanunsuz keçmə" maddəsi ilə cinayət işi açılıb. Bu maddədə 100 min dram məbləğində cərimə və ya 3 il müddətinə kimi azadlıqdan məhrumetmə cəzası nəzərdə tutulur.

Xatırladaq ki, T. Mikayılovun qohumu Bahar Mikayılova APA-ya onun yolu azaraq, Ermənistanın Cücə kəndinə keçdiyini bildirib. Həmin kənd sakinləri onu saxlayaraq Ermənistan sərhədçilərinə təhvil veriblər.