Ağdamda zəhərlənən ailə üzvlərinin sayı 7 nəfərə çatıb.

Ağdam Rayon Gigiyena və Epidemologiya Mərkəzinin direktoru Rəhman Məmmədov APA-ya açıqlamasında bildirib ki, ailə üzvlərindən 34 yaşlı Emin Cabbarov və onun 6 yaşlı qızı Mafizə Cabbarovanın vəziyyəti ağırdır.

R. Məmmədov onu da bildirib ki, qida zəhərləməsi ilə bağlı  xəstəxanaya müraciət edən Emin və Rahib Cabbarov qardaşlarının ailəsi olub. E. Cabbarov bir həftə öncə evdə kustar üsulla hazırlanmış xiyar turşusu yeyib. Həmin vaxt görmə pozğunluğu, udma aktının pozğunluğu ilə Bərdə və Ağcabədi rayon xəstəxanalarına müraciət edib. E.Cabbarovun vəziyyəti ağırlaşdığından botulizm diaqnozu ilə Klinik Tibbi Mərkəzin Yoluxucu xəstəliklər şöbəsinə köçürülüb.

Araşdırma zamanı məlum olub ki, ailə üzvləri də ad günü məclisində evdə hazırlanmış xiyar və pomidor turşusu yeyiblər. Xəstəxanaya müraciət etsələr də, turşu yediklərini bildirməyiblər. Vəziyyətləri ağırlaşan 31 yaşlı Cabbarova Əsmər Fərhad qızı, 29 yaşlı İsmayılova Elnaz Fərhad, 28 yaşlı Cabbarova Aygün Cəbrayəl qızı, 30 yaşlı  Cabbarov Rahib  Cəbrayıl oğlu, 10 yaşlı Cabbarova Nərmin Emin qızı, 6 yaşlı Cabbarova Mafizə Emin qızı və 3 yaşlı Cabbarov Rahil Nicat oğlu iki təcili-tibbi yardım maşını ilə Bakı şəhər Klinik Tibi Mərkəzinə çatdırılıb.

Ağdam Rayon Gigiyena və Epidemologiya Mərkəzinin əməkdaşları ailə üzvlərinin yediyi qida məhsullarından nümunələr götürərək laboratoriyaya göndərib.

Hadisə ilə bağlı hüquq mühafizə orqanlarına məlumat verilib. Araşdırma başlanıb. 

Bir neçə gün öncə Liman şəhərinin “Xutor” deyilən yaşayış massivində üç evə basqın edərək 4 nəfərə ağır xəsarət yetirən və nəticədə onlardan birinin ölümünə səbəb olan naməlum şəxs barədə yeni təfərrüatı məlum olub.

Dalga tv Oxu.az-a istinadən xəbərinə görə, quldurluq edən şəxs saxlanılıb.

Lənkəran şəhər rayon Polis şöbəsinə daxil olan məlumata görə, yanvar ayının 13 və 14-də Liman şəhərində üç ünvanda basqın hadisəsi baş verib.

Lənkəran şəhər rayon Polis şöbəsinə daxil olan məlumata görə, yanvar ayının 13 və 14-də Liman şəhərində üç ünvanda basqın hadisəsi baş verib. Hadisələr zamanı şəhər sakinləri - 48 yaşlı Samirə Miriyevanı və 69 yaşlı anası Humay Qarayeva, həmçinin 16 yaşlı Heybət Abdullayev, 50 yaşlı Nəcəfqulu Həsənov yaşadıqları evdə döyülərək ciddi bədən xəsarətləri alıb. Onlar Lənkəran Rayon Mərkəzi Xəstəxanasına çatdırılıb. Yaralılardan Samirə Miriyeva başından aldığı çoxsaylı zərbələr səbəbindən xəstəxanada ölüb.

Zərərçəkmişlərin ilkin ifadələri alınaraq hadisələri törətməkdə şübhəli bilinən şəxsin kimliyi müəyyən edilib. Onun Liman şəhər sakini, M.Ə.Rəsulzadə küçəsi 24 ünvanında yaşayan Zeynalov Fərrux Sabir oğlu olduğu ortaya çıxıb. Barəsində axtarış elan olunub.

Liman sakinlərinin sözlərinə görə, insanları vəhşicəsinə döyərək onlara ölümcül xəsarətlər yetirən Fərrux Zeynalovun psixi durumunda ciddi problemlər olub. Hətta, onun özündən böyük qardaşının da psixi problemləri olub.

Hələlik, hadisələrin hansı səbəbdən baş verdiyi barədə açıqlama verilmir. Lakin, barəsində axtarış elan olunan Fərrəx Zeynalovun bu gün saxlanıldığı söylənilir.

Bakının mərkəzində yaşayış binasında baş verən yanğın söndürülüb.

APA-nın hadisə yerində olan müxbiri bildirir ki, bu barədə yanğın baş verən ərazidə olan Fövqəladə Hallar Nazirliyi(FHN) Dövlət Yanğından Mühafizə Xidmətinin (DYMX) rəisi, general-mayor Füzuli Əsədov bilirib.

F. Əsədov qeyd edib ki, hadisə nəticəsində binanın 2000 kv.metr dam örtüyünün 250 kv.metri yanıb.

Onun sözlərinə görə, yanğın barədə siqnal saat 08.29-da daxil olub.

Hadisə yerinə FHN-nin 12 texnikası, 50 nəfərədək canlı qüvvəsi cəlb edilib.

Yanğın nəticəsində xəsarət alan olmayıb.

Bu gün saat 12:00-da 20 Yanvar  şəhidlərinin xatirəsinə ehtiram əlaməti olaraq Azərbaycan ərazisində nəqliyyatın və piyadaların hərəkəti 1 dəqiqəlik dayandırılıb.

APA-nın məlumatına görə, nəqliyyat vasitələri, Bakı buxtasındakı gəmilər, metro və yerüstü qatarlar fit verib.

20 Yanvar - Ümumxalq hüzn günü münasibətilə Azərbaycanın xarici diplomatik korpuslarında, dövlət qurumlarında, hərbi hissələrində və gəmilərdə dövlət bayraqları endirilib.

"Qışda psixoloji olaraq bədən xəstələnir. Bunun da başlıca səbəbi günəşsizlikdir. Ona görə içəridə qalmayın".

Publika.az xəbər verir ki, bu sözləri Türkiyəli daxili xəstəliklər üzrə həkim, kardioloq, professor Canan Karatay deyib.
Onun sözlərinə görə, xəstəliklərin başlıca səbəbi həm də D vitamini çatışmazlığıdır:

"Qış olsa da, qar, dolu yağsa da, hər tərəf buz bağlasa da, küçəyə çıxıb gəzin. Dəniz kənarında, meşələrdə gəzin. Bu zaman depessiyadan da xilas olarsınız. Günəş az göründüyünə görə tez-tez depressiyaya düşürsünüz. Ancaq təbii qidalar qəbul etdiyiniz zaman depressiyaya düşməzdiniz".

Kardioloq D vitamini əskikliyini aradan qaldırmağın yollarını da açıqlayıb:

"20 min xəstəmin 99 faizində D vitamini çatışmazlığı var. Bunun səbəbləri çoxdur. Günəş şüalarını az qəbul etmək, hava kirliliyi, heyvan mənşəli qidalardan, heyvanların daxili orqanlarını yeməkdən imtina etmək bu sıradandır. İllərdir bizə bu qidalar xəstəlik, infarkt səbəbi olduğu deyilirdi. Ona görə də insanların çoxunda D vitamini əskikliyi var.

Bu problemi aradan qaldırmaq üçün təbii qidalar qəbul etməlisiniz. Qışda hansı turşu sevirsinizsə, evdə hazırlayın, içinə əlavə qatqı maddəsini vurmayın. Qışda mütləq evdə hazırlanmış sümük suyu, xaş, ev qatığı, bol sirkə istifadə edilməlidir. Bunlar hamısı sizin üçün lazım olan təbii probiotiklərdir (insan orqanizminə müvafiq miqdarda daxil edildikdə onun sağlamlığına fayda verən "canlı mikroorqanizmlər").

Azərbaycanın Gürcüstandakı səfirliyində 20 Yanvar faciəsinin 28-ci ildönümü ilə bağlı anım tədbiri keçirilib.

APA-nın Gürcüstan bürosunun məlumatına görə, səfirlikdə faciəni əks etdirən foto və kitablardan ibarət sərgi təşkil olunub. Mərasim şəhidlərin xatirəsinin bir dəqiqəlik sükutla yad edilməsi ilə başlayıb. Daha sonra 20 Yanvar hadisələrinə həsr olunmuş sənədli film nümayiş etdirilib.

Azərbaycanın Gürcüstandakı səfiri Dursun Həsənov çıxışında 1990-cı ilin qanlı yanvar hadisələrinin qısa tarixindən danışıb. Diplomat 20 Yanvar  hadisələrini Azərbaycan xalqının şərəfli qəhrəmanlıq səhifəsi adlandırıb. O, Heydər Əliyevin 20 Yanvar faciəsinin dünya ictimaiyyətinə çatdırılmasındakı əvəzsiz roluna toxunub: “Faciənin səhəri günü Heydər Əliyev Azərbaycanın Moskvadakı daimi nümayəndəliyinə ailə üzvləri ilə gələrək, kəskin bəyanatlarla çıxış etmiş və qanlı faciənin günahkarlarını cinayətkar adlandırmışdır”.

D. Həsənov Azərbaycan prezidenti İlham Əliyevin 20 Yanvar faciəsinin dünya ictimaiyyətinə çatdırılmasına xüsusi diqqət ayırdığını vurğulayaraq, dövlət başçısının şəhidlərin ailələrinə göstərdiyi diqqət və qayğıdan da söz açıb.

Sonra çıxış edən Marneuli rayonunun icra başçısı Temur Abazov deyib ki, müstəqillik uğrunda şəhid olanların əziz xatirəsi daim xalqın ürəyində yaşayır: "Gürcü xalqına bu faciə yaxındır. Belə ki, 1989-cu ilin aprelin 9-da Gürcüstan da eyni qanlı hadisələri yaşayıb".

Gürcüstan parlamentinin deputatı Ruslan Hacıyev bildirib ki,20 Yanvar faciəsi Azərbaycan xalqının azadlıq uğrunda mübarizəyə hazır olduğunu sübut etdi. O, qanlı faciənin növbəti ildönümü ilə bağlı Azərbaycan xalqına başsağlığı verib.

Anım mərasimində Gürcüstanın ictimai və siyasi xadimləri, Marneuli rayon rəhbərliyinin nümayəndələri, azərbaycanlı deputatlar, ziyalılar və gənclər iştirak edib.

20 Yanvar faciəsi ilə bağlı anım tədbirləri Gürcüstanın Kvemo Kartli bölgəsi və bir neçə ali məktəbdə də keçirilib.